uMthunywa
YiNtatheli kaMthunywa
KULENDODA yeGwanda esele ithoba amanxeba ngemva kokubanjwa xhaka incinda uluju lwemvelo lomfazi womuntu emini libalele.
Insindabaphenduli le yenzakale emavikini amabili edluleyo lapho uMnumzana Elikana Sibindi abanjwe xhaka loNkosazana Silindiwe Moyo bencinda uluju lwemvelo emzini kaMnumzana Baboniswe Ndlovu.
Ekhuluma loMthunywa omunye wezakhamizi zakule indawo uMnumzana Bhekuthando Mnkandla uchaze ukuba babukele ukudla kwamehlo.
“Esakubonayo leliyana ilanga singeke sikukhohlwe sabona indoda endala iqansa isihlahla izama ukucatsha. UNdlovu bamkhanda encindela uluju lwemvelo lonkosikazi womnikazi icala engaliboni kanti lelonga wayengabuzanga elangeni.
“Umnikazi womfazi wafika wavula umnyango ngokuthula ngoba kukhanya wayeselodletshana lokuganga komkakhe.
“Uthi wathi ebona ukuthi lomkakhe ukhonapho wadobha induku wamgijimisa leyondoda ithe ibona sokunzima yanombela isihlahla somkhuna. Kanti kabuzanga elangeni laye wasinombela uNdlovu yena ke weqa esuka phezulu watshaya phansi ngengalo. Wabaleka ingalo ivele isikhanya ukuthi ingabe isilimele,” kubika uMnu Mnkandla.
Uqhubekele phambili echaza ukuba lokhu kwabethusa kakhulu ukuthi umuntu udelela emzin wenye indoda emini libalele.
“Umuntu uyabe ekudelela sibili angene alale lomkakho embhedeni angawuthenganga akwenzi lokhu. Idlalicatsha leli lafunda isifundo ngoba khathesi kuzwakala ukuba isandla sesafakwa isamende kutsho waqamuka ngesikhathi esiwa esihlahleni,” kuchaza uMnu Mnkandla
Ekhuluma lentatheli uMnumzana Elikana Sibindi onguye owabanjwa lomfazi womuntu uchaze ukuba lokho okukhulunywayo ayisikho.
“Abantu bazaqamba amanga ukulimala ngalimala ngawa esihlahleni ngigamula hatshi ukuthi ngangigijinyiselwa umfazi womuntu. Okomfazi womuntu ngiyaqala ukukuzwa ngawe,” kubika uMnu Sibindi
UMthunywa uxhumane loMnu Ndlovu onguye owathola umkakhe eledlalicatsha oveze ukuba ulesimanga ngakuthola emzini wakhe.
Imizamo yokukhuluma loNkszn Moyo yehlule ngoba umkakhe uyalile ukuba akhulume kumakhalekhukhwini.
