WATSHA TSOTSI: Sinuka imikhondo yezigilamkhuba

18 Jun, 2015 - 08:06 0 Views
WATSHA TSOTSI: Sinuka imikhondo yezigilamkhuba

uMthunywa

SIYADIBANA njalo mahlabezulu! Amhlophe Zulu kandaba ngoba ubuqotho bomsebenzi wenu buqhubeka buziveza ngezithelo zokujimba njalonje. Phela sikhuluma kunje nje, uIgnatius Tshalamanda (29) obehlala ku-C271 emzini weLwendulu edolobheni leHwange anduba atshaye utshani, limtshisile. Ubethe tshoko phakathi komphakathi eFolosi ecabanga ukuthi icala lokweba aletheswayo selabola! Umlandu udinga ukumelwa ngumnikazi uze uphutshe.

Kule iviki silabanye abantu abane ababotshiweyo. Owakuqala nguRobious Nkomo (46) ohlala emzini wakhe esigabeni sakoMathe eTsholotsho. Ithe isihlome yaphelela impi yomanyano kazulu lamapholisa, inqumanquma inuka imikhondo yezigilamkhuba, yabe imjimba elibele okaNkomo ephafuza lokuthengisa izidakamizwa. UNkomo utholakale elama “bhola” embanje angamatshumi amabili lasikhombisa-27.

Sihlala sikhumbuza lokukhuthaza ikakhulu abasakhulayo labantwana bezikolo ukuthi bangasebenzisi izidakamizwa. Kodwa-ke, isisusa ngabanye bethu abadala abafana loRobious Nkomo oleminyaka yobudala emveza njengokhulu walabo abasesesikolo! Nxa umntwana wesikolo engaqhubela ukhulu lo imali efuna imbanje engayiyala yini uNkomo? Olunye udubo olutholakala ebantwini abanje, yikuthi abahlala labo balakho ukubatshontshela kumbe ukuzisebenzisela lezozidakamizwa. Bakwethu, kasidinwa ukulikhuthaza ukuthi xekanani lokwephula imithetho. Ukubotshwa kubi kukanti njalo, ukuya ejele ah, kasikhulumi!

Owesibili ngobotshelwe ukutshaya omunye umuntu. Lo nguXolani Nkomo (36) ohlala emzini wakhe esigabeni sakoJowa eTsholotsho. Sokungani abantu bakulowomango bayizoni. Hatshi, okumqoka yikuthi sazi ukuthi kungumlandu wethu sonke ukwenqabela ukudalwa kwamacala ezigabeni zethu. Kubikwa uXolani exabane loMeluleki Sibanda (32) oyisakhamuzi sesigabeni sakoMakuvaze eTsholotsho. UXolani wehluleke ukuzithiba wathela uSibanda inqindi ezintathu esihlathini engavikwanga.

Kakukacaci ukuthi amadoda aseZhwane la abeqholozelana yini kumbe abebangani kodwa kuvele ukuthi uXolani nguye otshaye uMeluleki. Bakwethu, uma sikhuthaza ukuthi khuzani ulaka siyabe sisitsho siqeda ngoba lungeyinye yembangela yokudalwa kwamacala odlakela. Njalo, ulaka lolu lucina lubangela ukubulalana ngokwakho. Isixwayiso sethu yikuthi “kwabo kagwala kakula sililo”. Balekelani emapholiseni. Lokho kakutsho ukuthi lingamagwala mpela mpela mahlabezulu. Kodwa-ke, kutsho ukuthi lithanda ukuthula. Lithanda intuthuko loxolo okuyisibusiso phakathi komphakathi ngoba kutholakala kwabalutshwana.

Owesithathu obotshiweyo nguTapiwa Chiyadzwa oyetheswa icala lokweba i-generator yomngane wakhe eFolosi.

Pho ubungane buyabe bungaphi kusimo esifana lalesi? Obekungcono yikucela kumbe ukubuza indlela umngane kaTapiwa, umamangala (Simbarashe Gwayi) ayithola ngayo i-generator leyo ukuze umetheswacala laye athole eyakhe. Ukutshontsha, hatshi! Kulicala njalo kuyisono. Qaphelani bakwethu ngoba abanye abantu bengasathembeki. Labo bonke abangasathembekanga, sibakhuthaza ukuthi bahlambuluke bathembeke kubangane babo laye wonke umuntu ngoba ukuthembeka kuletha izibusiso lentuthuko. Ukweba i-generator ye-$250-00 kakusizi ngoba lamuhla uTapiwa Chiyadzwa esesendleleni yokuya ejele. Imuli kaChiyadzwa yiyo esizagconwa ngesono sikababa lokulahlekelwa ngamathuba okuselelwa yena esesentolongweni.

Owokucina kwababotshiweyo kule iviki nguVincent Shoko oyisakhamuzi saseShangano esiqintini seHwange.

UShoko wetheswa icala lokuthiya lokubamba ithendele leganga elibiza intengo ye-$100. Kunzima, kudala kwakunganje! Yebo ye bekuzingelwa zonke izinyamazana zasendle kanye lezinyoni, kuthiywa lenhlanzi abantu besidla besutha baze bakhombe ngophakathi. Kwaphela. Lamuhla sesizilondoloza zonke lezizidalwa ngoba zingatshabalala. Lokhu kuqakathekile ukuba kwazi ngoba ungazingela usithi kuvele kulisiko, uzabotshwa, uthonisiswe, ugwetshwe njalo upike kabuhlungu. Ukungazi ukuthi ukuthiya imijibila kulicala kakumvikelanga uVincent Shoko. Bamtshisile ngecala elethiwa igama le-trapping.

Abane laba esixoxe ngabo lapha, babe yisibonelo esihle bakwethu esokuqinisa inkuthazo yethu yokuthi ukona kakulunganga. Kasiphileni impilo emsulwa. Kunzima yebo ye ngoba umhlaba uyahlaba wona ngokwayo, kodwa ukwenqabela icala lesono kulicebo elihle lokuphendla indlela yobungcwele.

Lingakhohlwa ukuthi lani lilakho ukusiphathisa ekwengezeni izithelo zomsebenzi womanyano kazulu lamapholisa. Kungumlandu wethu sonke ukulondoloza ukuthula, intuthuko lenhlalakahle ngokulwa loCALA kanye loyise uSigilamkhuba.

Umlobi utholakala ku-04-700171-9 Extension 3193; 0735752386/0716616987/0783185092 kumbe ebulenjini [email protected], [email protected] kumbe [email protected] yikho lapho elingithola khona.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds