uMthunywa
INHLOLISISO eyenziwe ngabacuphi beZimbabwe Republic Police (ZRP) Criminal Investigation Department (CID) eGweru (CID Gweru), iveza ukuba kuviki edluleyo amapholisa la amukele amacala alitshumi lantathu.
I-CID Gweru yiyo ephatha indaba zakoCALA lomzali wakhe uSigilamkhuba kusukela kulelodolobho kuze kuyefika kundawana zonke zasemaphandleni aligqagqeleyo; agoqela iLower Gwelo, Somabhula, kusiya eLalapansi lakulo umango wakoTongogara ongasekuyeni eKwekwe.
Ku-13 le, kulodaba lokubulawa komuntu; olokweba izigangi zihlomile; eziyisithupha ezokugqekezelwa kwabantu emizini yabo lolokugqekezwa kwesitolo, kwatshontshwa impahla; olokwebiwa kwemota lolokutshontshwa kwempahla ebikweyinye imota ehlukene lalezi ezitshontshiweyo.
Mahlabezulu, ukuphatha indaba ezingu-13 kuviki yinye ezinikwa kuCID yaseGweru, kukhomba indingeko yokuba silimukisane ngezehlakalo lezi ukuze sihlale siqaphele. Phela okwenzakala koDube lakoDlamini kuyenzakala ngakho; kumele siphange sincwebane indlebe ukuze senqabele ukumemetheka komona lamacala la.
Ngokunjalo, kungumlandu wethu sonke bakwethu; ukucebisana ngamasu wokwenqabela amacala la ngoba yiwo asichithela inotho lempahla yethu enengi kakhulu!
Sithi singalihluzela lokuhlaziyela inani lamacala esiyabe sihlangane lawo ezindaweni zonke esanelisa ukuzifinyelela viki zonke; sibe sesifaka amakhanda ndawonye ukuba singanqoba njani empini kaCALA.
Lamuhla sizahlephuna ku-13 le siyihlafune sonke.
Kudaba lokubulawa komuntu; umuyi, obehamba lomngane wakhe; uhlaselwe liqembu labantu besilisa elingaziwayo kodwa ebelilabantu abagqoke ezimnyama. Umngane kamuyi uphunyuke nzima anduba agijimele enkambeni ukuyabika loludaba. Amapholisa aphuthume njengemihla yonke egijimela kulesosehlakalo, kodwa-ke afice umuyi esethule. Lusacutshungulwa loludaba.
Kolokweba ngodlakela kutshontshwe $400. Kubikwa kulabantu besilisa ababili abangazakalanga, abahlasele umamangala ongumuntu wesifazane, ngesikhathi ezihambela-nje kwezinye zezindlela zeGweru ezisibatheleyo.
Izitha lezi zondle umamangala kusukela esesenkabeni yedolobho zaze zamhlasela esephumile. Bavelele ngemva kwakhe sengathi yizihambi-nje bathi sebeqondane laye, bamdumela bemdonsela emnyameni lapho abafike bamfuqela khona phansi, bamhlubula impahla yangaphakathi.
Umamangala usile manzonzo ngoba izigangi lezi zithe sezimhlubule izidwaba, zananzelela ukuba usemfuleni. Yeyi madoda, kunzima! Kubikwa izigilamkhuba lezi zicine zitshontshela umamangala i-HP laptop ebiza $400, zanyamalala.
Siphetha ngokulitshayela ihlombe mahlabezulu ngokuncedisa amapholisa ukubopha amasela angu-8 abesehlukuluze abantu eHarare lakundawana ezigqagqele lesosigodlo (The Herald, 16 October 2018).
Lingasixhuma njalo [email protected] kumbe kumhleli, sixoxe ngokunye.
