uMthunywa
YiNtatheli kaMthunywa
NGENXA yokungafuni ukwaliwa kulenina leLutumba, eBeitbridge eligwaze umntwana walo wafa andubana lizibophele ngemva kokwaliwa yindoda.
Umuyi uFortunate Ndou, 31, utholakale ezihilele kwesinye isihlahla egangeni ngoMgqibelo kuviki ephelileyo.
Kucatshangelwa ukuthi umuyi ubeselamalanga amathathu efile ngesikhathi isidumbu sakhe sitholakala.
Izakhamizi zibike ukuthi besekulamalanga amathathu bedinga umuyi lengane yakhe yakhe ebileminyaka yokuzalwa emine.
Kuzwakale ukuthi umuyi waxabana lomkakhe uTinotenda Sinyolo 34 okuyikho okwabangela ukuthi aliwe kodwa lokhu akuzange kumphathe kuhle nanko phela wazama ngamandla onke ukuncenga umyeni wakhe kodwa kwala.
Ngokuthukuthela okukhulu umufi kubikwa wathatha umntanakhe ongumfana waqonda endaweni engaziwamuntu.
Kuvele ukuthi ngesikhathi eqonda egangeni wabonwa ngomunye umakhelwane othande ukwaziwa ngelithi Mapiravana nje kuphela. Umakhelwane lo ubikele uMthunywa ukuthi wayesiyadinga inkuni zokuthengisa ngesikhathi ebona inkemenkeme yonke le.
“Ngangisiyagamula inkuni zami zokuthengisa ngatshaywa luvalo ngesikhathi ngifika ngaphansi kwesihlahla ngibona umntwana owayephakathi kwesiziba segazi.
“Ngilokho ngisamangele ngatheneka amadolo nxa ngithi ngiyakhangela phezulu ngabona owesintwana elenga esihlahleni,” kutsho uMapiravana.
Esebone insindabaphenduli yendaba wagijima esiyabikela izakhamizi zakule indawo zona ezathola ukuthi nguMaNdou ongomunye wezakhamizi zakulindawo.
UMthunywa wenelisile ukukhuluma lomkamuyi uSinyolo yena oveze ukuthi ulahlekelwe kakhulu. Ubike ukuthi kuliqiniso ukuthi babexabene lomkakhe wathi kasamfuni kodwa wayethi kumbe kuzaxoliswana kuphele.
“Ngilahlekelwe kakhulu, bengisamthanda umkami kodwa saxabana nje ngacabanga ukuthi kwedlule. Ngangingazi ukuthi engangenwa ngumoya wokuzibulala aphinde abulale ingane yethu,” kutsho uSinyolo.
Omunye wamapholisa ongaqanjwanga ngebizo ukuze kuvikelwe umsebenzi wakhe uveze ukuthi ngempela kuliqiniso. Kubikwa umntwana wayegwazwe ngengqamu esifubeni kathathu, kuthi inina lazihilela ngentambo kagetsi.
