uMthunywa
Ethel Ncube
ISELE ibambe izisila zejuba enye indoda yeBinga, eChipale ngemva kokwaliwa ngumfazi kubangwa ukuthi iyehluleka ukumthengela i-airtime.
Indaba le yenzakale ngempelaviki lapho uMnumzana Ben Muleya ephelelwe ngumuzi ngoba esehluleka ukujusa ucingo lomkakhe uKhonsi Mudimba, uMthunywa ukuzwile lokhu.
Intatheli ikhulumisane lesinye isakhamuzi sakule indawo uNkosazana Melani Msebe esiveze ukuba silesimanga ngale indaba.
“Kuliqiniso sibili uMaMudimba wathwala izikhwama zakhe wabuyela kibo ethi indoda yakhe ayifuni ukuthenga i-airtime yedola. Wachaza ukuba sebeleminyaka emibili behlala bonke indoda ayikaze ithenge ngitsho iphenti ihlala isithi ayilamali lanxa ilayo iyidlela esikhwameni,” kubika uNkszn Msebe.
Uphinde waveza ukuba indoda le ihlala inathile, ayithengi lutho.
“Ubaba lo eyesikali sotshwala uhlala elayo kodwa eyokuninka umfazi kalayo. Khathesi uyakhala ngokuthi umfazi wambalekela kunguye nje ozehlulekelayo yedwa ukuthe anakekele umkakhe amncedise ngokudingakalayo. Idola nje kuphela ukuthi ehlukane layo kumehlule umfazi watshaya phansi,” kubika uNkszn Msebe.
Intatheli ibuye yaxhumana lomfazi owatshiya umkakhe uNkosazana Mudimba ovumileyo ukuba sowatshiya umendo.
“Mina ngingakithi, okomendo sokwehlula. Ngingahlala lomuntu ongenelisi ngitsho lokuthenga i-airtime ngitsho sona isikhindi, angeke ngitsho. Owakhe umakhalekhukhwini uhlala elemali mina wehluleka ukungijusela ngedola hatshi impondo pho ngiyabe ngithi ngizuzani khonapho.” Kutsho uNkszn Mudimba.
Ekhuluma loMthunywa uMnumzana Ben Muleya uveze ukuba umkakhe wazihambela.
“Nxa ukhuluma lami ubona angani ngingaswela idola mina. Lowo uzihambele yedwa, engxenye ubesethole indoda engcono. Okwamaphenti kanti athengwa yimi kumbe umuntu uyazithengela yedwa, kuthenga amadoda adlisiweyo. Hatshi, mina angidliswanga phela,” kuphetha uMnu Muleya.
