VIDIYO: Uqotsholiwe uMaqobola weCowdray Park

VIDIYO: Uqotsholiwe uMaqobola weCowdray Park

0 489

YiNtatheli kaMthunywa
ZEHLISE iphika izakhamizi zelokitshi leCowdray Park eGarikai Phase 2 koBulawayo ngemva kokuba kukhitshwe undofa obeselamanga ehlupha ngokutshaya abantu ngamatshe kanye lokuhlukuluza amanina ngokubadlwengula njalonje.

Abantu bakule indawo besebehlala bephethe izibindi ngezandla ngenxa kalundoda abesebemethe igama lokuthi nguMike Maqobola kusukela ekuthini lundofa ubeqobola abantu ngamatshe hatshi okokudlala.

Insindabaphenduli le iqale ngoLwesine lweviki ephelileyo lapho abantu abathi bezihlalele ezindlini bezwa ngamatshe kungakhanyi lapho avela khona.

UMthunywa uzwe ukuthi undofa lo ubelala labomama bavuke amaqolo ebuhlungu bediniwe kungani ngumuntu obelele lobaba kukanti abanye bebetshaywa lezindlu zijikijelwa ngamatshe.

Ngenxa yokuhlukuluzwa ngundofa lo abantu bacine bebiza abaphurofethi ukuthi bazosiza.

Ngesikhathi kukhitshwa undofa ngoLwesithathu emini uMthunywa ubekhona wenelisa ukukhulumisana lomunye wabomama obekhona oziveze ngokuthi nguNokuthula Moyo.

“Sesizaphumula khathesi ngondofa laba, besingasalali ngenxa yamaqolo abuhlungu ngokuhlukuluzwa emacansini yinto le.

“Ngikhuluma nginje manengi amanina athukutheleyo njalo esabayo ngoba bekusaziwa ukuthi lingavele litshone okuMaqobola kuyangena ezindlini kuhlukuluze omama.

“Abantwana labo bebengasalali bekhala okungapheliyo singazi ukuthi bakhaliswa yini,” kutsho uNkosazana Moyo.

Intatheli iphinde yaxhumana lomunye wabaphurofethi okhahlelwe ngundofa waphosa waphela umoya uMnumzana Kenneth Munsaka, ochaze ukuthi bekunzima.

“Ngesikhathi ngikubambile bengilwisana lakho, bekulamandla kakhulu kungakho besengingani ngiphela umoya. Okwakhathesi sengikhululekile sokuphumile,” kutsho uMnu uMunsaka.

Undofa lo uphume endlini kaMnumzana Titos Gumbo yena owalileyo wathi ngamasalamusi, “Akulanto enjalo, bathi undofa ngimgcinisiwe. Ngokabani? Ngifuna umnikazi wakhona. Amangqongqo la athengwe eCity Hall, akulalutho lapha. Mina angilazinto endlini yami, lo okubambileyo ubuye ezithwalele okwakhe,” kuphetha uMnu Gumbo.

SIMILAR ARTICLES

NO COMMENTS

Leave a Reply