uMthunywa
Na Densen Makwaiba Kulube
Ri ri dada la u luma, tshivhavhala tsha shango, vele la mbeu, damba-ntshekwa lina sege, maganu a nemeneme, tshiulu tsha madini, iwe une wari ifa nda fa muhali, ndee! ndee!/ Aa!. Nga urali ri luvha mahosi na vhalanda vha venda. Mbilaluma, Khakhamela, Mavu a Venda.
Maemu ndi musidzana we a do ri musi a tshi fara gole la vhuvhili a ponya kha khombo ya tshiendedzi ye ya vhulaha vhabebi vhawe na vhathu vhothe vhe vha vha vhe ngomu. Vhadivhi vha aya mafhungo vhe Maemu o ponya nge tshiendedzi tshe vha vha vhe khatsho tsha mu tanza tshi sa athu u phiguluwa. Izwi zwo ita uri tsiwana iyi i aluswe nga malume ayo Vho-Tshidudu vhe vha vha vhe na vhana vha fumi.
Naho Vho-Tshidudu vho vha vha tshi funa uyu muduhulu wawo, vho swika he vha vho kundelwa u sumbedza ulwo lufuno nge mufumakadzi wavho, Vho Mutshekwa, vha do fhatela vivho la uri uyo nwana u nga u vho funwa u fhira vhavho vhana. Vivho ili lo ita uri vhutshilo ha Maemu vhu shanduke lwa tshothe. Malume awe vho do swika he vha vha vha tshi vho ofha u amba nae nge vha vho shavha u kwasha muta wavho. Zwiliwa o vha a si tsha zwi wana nga pfanelo, zwiambaro ha vho vha mathatha, musi hu tshi edelwa ene o vha a tshi fuka saga a siamela tshanda. Musi e kha gireidi ya malo ovha e ene a no fanela u divha uri munwe na munwe mutani wa ha Tshidudu o la nahone o ambara zwiambaro zwo kuvhiwaho na u ainiwa zwavhudi. Vhukuma tsiwana ya Mudzimu yo vha i tshivheregi tshi sa holi.
Tshe tsha balela vho Mutshekwa ndi u litshisa uyu nwana tshikolo. Muthu we a thusa ndi Thoho ya tshikolo vhe, nga u vha na ndivho ya vhutshilo ha uyu nwana, vha ombedzela uri Maemu ha ngo fanela u litsha tshikolo. Izwo zwo do sinyusa Vho Mutshekwa tshothe lwe vha mbo ita tshikwekwe tsha u rambela uyu nwana vhavhulahi.
Nangoho phondi yo wanala ya rengwa nga rannda dza zwigidi zwiraru Phondi iyi yo do ri i tshi kha di ita tsedzulusu ya uri i nga thuntsha Maemu hani, lini na ngafhi, ya vho sevheliwa uri uyo nwana ane ya khou toda u mu vhulaha ndi tsiwana. Izwi zwo do i khaula mbilu ya humbula uri muthu ane ya tea u mu vhulaha ndi vhone Vho Mutshekwa.
Kha ri kwamane kha diresi itevhelaho, [email protected] kana lutingo kha nomoro dzi no uri, 0772 387 272
