uMthunywa
YiNtatheli kaMthunywa
UHLALE amasizini amabili engabonakali eligiqa ibhola lenguqu kodwa uthe ephenduka wahwatsha ezibabayo.
Lo ngumdlali weqembu leHighlanders uOzias Zibande odume ngelithi Ozizi kunguqu. Ufike kweZinkulu bamnika ithuba lokuthi engenza kahle ikakhulu kubalandeli balithimu.
NgeSonto babheme bakholwa ngalumdlali kulandela ukudlala okutshiye lababukeli beqakeza eHarare mhla iBosso isedlula phezulu “kwabantwana besikolo” iHerentals nge 2-0.
Uhlohle wonke womabili, kwaba yisibonelo sokuthi umdlali lo usewazi umdlalo ofunwa ngumqeqetshi uMadinda Ndlovu.
Amabhola awahlohlileyo anikeze iqembu lezimnyama ngenkani isihlalo saphezulu kulogu.
Kumdlalo wesithathu iHighlanders ihlasela iTriangle okungumdlalo ozaphosa amehlo kuZibande.
Kusukela kumidlalo yobungane kusalungiselelwa isizini, uZibande wenze kuhle kulabadlali abaqhatshelwa ukuthi balithele entanjeni. Umgadli othenjiweyo uNewman Sianchali lokhu esadinga iqhinga lokuhlohla.
Ubukhali bukaZibande bungamkhipha esikhundleni uSianchali nxa engehluleka ukwenza akulande kuBosso.
UZibande uthembisa ukubonisa ukudla kwamehlo njengalokhu ayekwenza ngesikhathi iBosso iqeqetshwa nguKelvin Kaindu.
Iphephandaba likazulu lixhumane labasekeli asebebukele imidlalo kaOzizi, abathe bayasuthiseka ngabakubonayo.
Okuphume kanengi yikuthi uZibande adlaliswe kuyo yonke imidlalo.
“Kaqhubeke ehlohla ngoba uyenelisa ukulandela ibhola ayedinga isikhala sokuhlohla. Udlala njengomgadli sibili,” nguPhindile Ncube umlandeli owaziwayo ezihlalweni zeSoweto eMagumeni.
UThomas Dube osePlumtree ukholwa ukuthi uZibande nguye umgadli owayedingwa.
“Isicelo sami kuMadinda yikuthi adlalise umfana nsukuzonke, ikakhulu phambili kwethu eBarbourfields.”
