uMthunywa
Gladmore Ncube
BEKULITSHEBETSHEBE likaShangani izolo enkundleni yeWhite City koBulawayo emcimbini wokuthokozela inkululeko yelizwe leZimbabwe esileminyaka engu-38 lathola uzibuse.
UMinister of State for Provincial Affairs koBulawayo, uKhomuredi Angelina Masuku nguye owethule amazwi kaMongameli welizwe, uKhomuredi Emmerson Mnangagwa.
Esabelweni seMatabeleland South abantu bebethe gwaqa enkundleni yePelandaba kuthi eMatabeleland North umkhosi lo ugujelwe eLupane enkundleni yeSomhlolo.
Umkhosi walonyaka ubuthokozelwa ngonyawo olutsha kulandela inguquko eyaba khona kunyanga ezimbalwa ezedluleyo. Umkhosi kazibuse owelizweni lonke jikelele ubukhokhelwa nguMongameli welizwe uKhomuredi Emmerson Mnangagwa kulandela ukwehla esihlalweni kukaMnumzana Robert Mugabe.
Ekhuluma uKhmrd Masuku uthe uyathokoza ukubona abantu beze ngobunengi bezothokozela inkululeko yelizwe leZimbabwe.
“Ngiyalibingelela lonke Bulawayo omuhle njalo ngiyathokoza ukulibona lize ngobunengi benu lizothokozela ilanga lokuzalwa leZimbabwe. Ngizalethulela amazwi avela kuMongameli welizwe uKhmrd Mnangagwa.
“Amaphutha manengi ayenzakale kuleli kodwa lamuhla kumele sithokozele ukuthi sathola uzibuse njalo sikhumbule lamaqhawe ethu asifelayo ukuze sikhululeke lamhlanje.
“Mina loHulumende sikhangelele ukuthi iZimbabwe isukume njalo iqine izimele njengakudala.
Ukuntshintsha komumo akwenzakali ngesikhathi esifitshane ngakho sikhangelele ukuthi kusiyafika umnyaka ka2030 eZimbabwe kasifuni kuhlutshwa yindlala, sifuna ukuzimela sodwa.
“Okuzavusa umnotho wethu kakhulu yikulima ngoba kulohlelo lweCommand Agriculture osekubekwe imali engange$10 miliyoni ukuze iphathise abalimi baseMatabelend North kanye laseMatabeleland South ukuze bangene kunhlelo zofuya inkomo,” nguKhmrd Masuku lowo.
“Sikhangelele ukuthi ngokuya kwesikhathi senelise njalo ukungena kwezinye izindawo sibaphathisa ngohlelo lweCommand Agriculture.
“Ngenxa yokuthi umumo womkhathi uyaguquka thina loHulumende sesibone kungcono ukuthi sakhe amadamu azakwenza ukuthi abalimi bangasweli amanzi ezilimo. Amadamu la azakwenza ukuthi abalimi benelise ukulima bethelela.
“IZimbabwe isikhulumisane lamazwe amanengi idinga ubudlelwano lamaqhinga okuthi osomabhizimusi baqale ukusebenza lelizwe lethu. Ngilethemba lokuthi imisebenzi izakubakhona ngoba iZimbabwe ivulelwe ibhizimusi,” kutsho uKhmrd Masuku.
UMinister of State for Provincial Affairs esabelweni seMatabeleland South, uKhomuredi Abednico Ncube uveze ukuthi umhlaka 18 Mabasa lilanga elikhulu kakhulu ebantwini beZimbabwe.
“Umhlaka 18 Mabasa lilanga eliyisikhumbuzo ebantwini beZimbabwe ukuthi ilizwe leli alizange libuye nje kodwa kulabantu abanikela impilo zabo ukuze kutholakale uzibuse.
“Kuqakathekile njalo ukuthi abantu balithakazelele njalo ngoba litsho ukuthi kubalulekile ukuthi abantu beZimbabwe baphathe kuhle ilizwe labo ngoba latholakala ngokulahleka kwempilo zabanye abantu,” kuphetha uKhmrd Ncube.
