uMthunywa
Ethel Ncube
ZISELE zingelankani izisebenzi zenye inkampani yakoBulawayo kulandela ukuzibophela komunye wabo efuna imali yeKhisimusi, uMthunywa ukuzwile lokhu.
Isiga lesi senzakale ngeviki ephelileyo lapho uMunyaradzi athe esizwa ukuba kasoze alithole iholo lakhe wadobha intambo wazama ukuzibophela ephahleni lwalapho okudlelwa khona enkampanini le.
UMthunywa uzwe ukuthi izisebenzi zenkampanini yeQuicks Recovery lapho okusebenza khona uMunyaradzi sezilenyanga ezimbalwa zingaholi kodwa yena wahle waqhutshelwa iholo lakhe ngemva kokuqamuka kwentambo ayezama ukuzibophela ngayo.
Intatheli ixhumane lesinye isisebenzi senkampanini le esithande ukwaziwa ngokuthi nguDube nje kuphela esiveze ukuthi kuyabakhathaza okwenziwa ngabaqhatshi babo.
“Sasihlezi phandle kwalapho okudlelwa khona sezwa kusiwa into elesisindo akula owathi komunye asukume kodwa sonke sasukuma saqonda khona sathola uMunyaradzi esevule amehlo ngapha intambo imuthe mfi emphinjeni kukhanya sibili ukuthi iqamuke ephahleni,” kulandisa uMnu Dube.
Uqhubekele phambili echaza ukuthi bamthukulula intambo, bamhlalisa okubetha khona umoya andubana abachazele ukuthi okumenza azibulale yikuthi ufuna umholo wakhe.
“Samkhupha intambo samhlalisa phansi sambuza ukuthi kwenzenjani efuna ukuzibulala waveza ukuthi ufuna umholo wakhe, angeke ahambe endlini engelayo eyokupha abantwana okweKhisimusi.
“Umaneja wakule inkampani kazange athandabuze ukumupha imali wamholisa kodwa thina abanye asikaphiwa lutho,” kutsho uMnu Dube.
Esinye njalo isisebenzi esikhulume loMthunywa uMnumzana Elias Moyo uveze ukuthi iKhisimusi yalonyaka iphose yababonisa okunye enkampanini yabo.
“UMunyaradzi wacabanga ukuthi kungcono azibulalele enkampanini nxa engelayo imali yokuyathengela abantwana ukudla kwekhefu ukuze abaqhatshi babone ukuthi ngempela ukhathazekile ngemali yakhe.
“Kwaba yinhlanhla ukuthi intambo yaqamuka ngabe samthola esefile,” kutsho uMnu Moyo.
lphephandaba likazulu lixhumane lomaneja wale inkampani uMnumzana Desmond Robertson uvumile ukuthi sikhona isisebenzi esazama ukuzibophela.
“Isisebenzi lesi sazibophela kodwa asisafanga siyaphila njalo lasemsebenzini sikhona. Ngemva kokuzama ukuthi azibulale ngamnika iholo lakhe ukuthi ayelungisa okuhluphayo lemuli yakhe,” kutsho uMnu Robertson.
Ebuzwa yintatheli uMnu Robertson ukuthi kungani iSisebenzi lesi sakhetha ukuzibophela enkapanini uveze ukuthi kalaqiniso.
“Okuyikho okwamenza wazibophela angikwazi ngicabangela ukuthi engxenye wayelabangani abanengi abangamankazana abamkhathazayo ngoba mina angizange ngimbuze lutho.”
Ubuye wachaza njalo ukuthi isimo asimanga kuhle koQuicks Recovery.
“Izisebenzi aziholi ngoba inkampani ayilamali eyenzayo ukuthi zithole iholo lazo,” kutsho uMnu Roberson.
Imizamo yokukhulumisana lesisebenzi leso esasizama ukuzibophela yehlule.
