uMthunywa
Nkosilathi Sibanda
UKUZIMISELA ekuthuthukiseni umdlalo we-volleyball kuleli sekunikeze uKhanyile Dlamini isikhundla sokuphatha inhlanganiso yeZimbabwe Volleyball Association.
UDlamini ubenguntombazana wakuqala ukukhokhela inhlanganiso le.
Useqeqetshe amaqembu amanengi abalisa iHighlanders Ladies leqembu lakoBulawayo elincintisa minyaka yonke kumaYouth Games. Ngesikhathi ekhethwa esikhundleni esikhulu uDlamini ubeqeqetsha ikolitshi leNationl University of Science and Technology.
Ekhuluma lephephandaba likazulu uDlamini uthe uzaqinela ukumemethekisa umdlalo we-volleyball kuzo zonke indawo.
“Ngiyajabula ngokukhethwa kwami njalo ngikhangelele ukuqhubekela phambili ngomsebenzi wokumemethekisa umdlalo wethu. Kuyathabisa ukubika ukuba i-volleyball isidlalwa kuzo zonke izabelo kodwa sizafuna ukuthi ikhule lasezikolo.
“Okumele sikwenze khathesi yikunxusa ababukeli. Umdlalo uzakhula nxa ubukelwa ngabantu abanengi njalo yikho okuzabiza usekelo lwemali. Kwelakithi umdlalo lo usuphakama nanko phela amaqembu esizwe enze kuhle ngokunqoba kumncintiswanio yeSadc,” kutsho uDlamini.
Ngomnyaka ophelileyo inhlanganiso yeZVA yabika ukuba isithole impahla ezanikezwa amaqembu asacathula kanye lezikolo ngaphansi kohlelo lwayo lokuvuselela umdlalo lokuhuga abadlali abatsha.
Iphephandaba likazulu lizwe ukuba impahla le yeza lapho iZimbabwe ikhangelele ukunxusa amazwe e-Africa kumqhudelwano wamazwe eAfrica.
Kuloluhlelo kukhangelelwe kakhulu ukuthuthukiswa kwe-volleyball lapho engadlalwa khona emalokitshini, emadolobheni akhatshana, emaphandleni lasemapulazini.
