uMthunywa
Ethel Ncube
UKHANSILA kaWadi 5 eNtabazinduna uthembisa izakhamizi zakule indawo ukuba zizahlala phakathi komhlane lembeleko ngoba indawo yazo isizakuba lentuthuko kanye lengqubekela phambili.
UKhansila uBekithemba Qongo ozamela ibandla lezombangazwe leZanu-PF uveze ukuthi ufuna kube lamadamu, izikolo kanye lamakilinika endaweni ezitshiyeneyo ukuze umphakathi uthole indingeko zempilo lula.
Ekhuluma loMthunywa uKhansila uQongo uchaze ukuthi ufisa ukuba kwakhiwe ikilinika eduzane ukuze izakhamizi zingahambi umango omude.
“Amakilinika kumele angezelelwe abe seduzane abantu bangahambi umango omude besiya kwelatshwa. Kwesinye isikhathi umuntu uyagula ebusuku abantu babophe inqola bemuse esibhedlela abanye babo bacina besweleka endleleni. Akumelanga abantu bahambe umango omude, kumele bathole ukwelatshwa masinyane njalo eduzane,” kutsho uKhansila uQongo.
Uqhubekele phambili echaza ukuthi omama labo kumele bengatshiywa phandle labo kumele bathuthukiswe.
“Omama ngamaqembu abo kumele bahambe bayefunda imisebenzi yezandla etshiyeneyo babe lolwazi ukuze benelise ukuzithuthukisa kanye lemuli zabo.
“Ngemva kokufunda lokhu babuye bancediswe benze amaphurojekithi abo bengahlaleli izandla njalo labakwenzayo kube lempumela ukuze kube lentuthuko esigabeni,” kutsho uKhansila uQongo.
Ekhuluma ngodaba lwamanzi oluyilo oluhluphayo endaweni ezitshiyeneyo uchaze ukuba kumele kwenziwe yonke imizamo ukuthi abantu bawathole ngoba eyimpilo.
“Amadamu kumele agejwe abantu bathole amanzi lezifuyo zingahambi umango omude zidinga amanzi. Nxa kulamadamu kulula ukuba abantu balime izivande njalo bathwale izilimo zabo bayezithengisa koBulawayo bathole okokuziphilisa,” kuveza uKhansila Qongo.
Ukhansila uphinde waveza ukuba uzehlisa amasela ezigabeni zakhe ngokuncedisa abatsha ukuze babe lokokwenza.
“Abatsha kumele bathole imisebenzi ngoba nxa bengasebenzi kudala ukuba bacine besenza okungaqondanga okufana lokugqekeza emizini yabantu,” kuphetha uKhansila uQongo.
