Uzapika owehluleke ukubhadala isondlo

Uzapika owehluleke ukubhadala isondlo

0 352

Thando Dube
KULENDODA yeHwange efunde ukuthi lanxa ungasebenzi isondlo sabantwana siyabhadalwa kulandela ukugwetshelwa ukuyapika umnyaka ejele kumbe ukuthi ibhadale i$9 000 kunyanga kaMbimbitho.

UBonne Shane oleminyaka engu-57 yokuzalwa umiswe emthethwandaba we-Tredgold koBulawayo ngemva kokumangalelwa ngokwehluleka ukubhadala imali yesondlo okweminyaka emine.

Umtshutshisi uMnumzana Nkathazo Dlodlo ubikele inkundla ukuthi umetheswacala wehluleka ukubhadala imali yesondlo sabantwana abazala loNkosikazi Lindiwe Khumalo okweminyaka emine.

Ebuzwa emthethwandaba ngecala leli umetheswacala uvumile ukuthi wakwenza wathi wekela ukubhadala ngoba wayengasebenzi njalo egula.

“Ngehluleka ukubhadala imali le ngoba ngalahlekelwa ngumsebenzi njalo ngangigula. Ngisanda kuthola umsebenzi ngakho ngizimisele ukubhadala ingxenye yemali yesondlo ngingahola.”

Ngemva kokulalela icala leli umantshi uMnumzana Franklin Mkhwananzi uthe umetheswacala kavalelwe entolongweni okomnyaka owodwa kodwa nxa efuna ukuvika lokhu kahlawule i$9 000 inyanga kaMbimbitho ingakapheli.

Kusenjalo kulendoda yeBeitbridge evalelwe entolongweni ngemva kokwetheswa icala lokutshaya ibulale umfowabo.

UStanley Mbengwa oleminyaka yokuzalwa engu-31 umiswe emthethwandaba weBeitbridge kuviki ephelileyo esetheswa icala lokutshaya umfowabo waze wambulala.

Umtshutshisi uMnumzana Munyonga Kuvarega ubikele inkundla ukuthi mhlaka 9 Zibandlela umsolwa wayesesiqintini seJuta One eLutumba eBeitbridge lapho abaxabana khona lomuyi, uTitos Mbengwa ngendaba engasavezwanga emthethwandaba.

Umetheswacala kubikwa wabhaxabula umuyi walimala kakhulu okwabangela ukuthi afe mhlaka 12 lapho ayelaliswe khona esibhedlela seBeitbridge General Hospital.

Emisiwe phambi kukamantshi uMnumzana Langton Mkwengi kaphiwanga ithuba lokuvuma icala kumbe ukulilandula.

Umantshi ngemva kokulalelisisa icala leli ukhethe ukuthi icala leli lidluliselwe phambili kusahluzisiswa ngecala njalo kusadingwa ubufakazi obugcweleyo.

Umetheswacala uzathoniswa evela ejele.

SIMILAR ARTICLES

NO COMMENTS

Leave a Reply