Uzaba lit umcimbi kaMiss Tourism Byo 2018

05 Jul, 2018 - 00:07 0 Views
Uzaba lit umcimbi kaMiss Tourism Byo 2018

uMthunywa

Thando Dube loNkosilodumo Ndebele
KUSUKELA endulo idolobho lakoBulawayo lizigqaja ngokuba lentombi ezinhle ukwedlula zonke indawo kuleli.

Kumadili eNtwasa, emitshadweni kanye lakwamanye amadili, kwakujayelekile ukuthi isizwe sasizithokozisa ngokubukela amagcwalaguma ezansi egida njalo encintisana ngobuhle.

Kuthembisa ukuthi kuzakuba njalo ngoMgqibelo mhla kuqhutshwa umcimbi kaMiss Tourism Bulawayo.

Azahlangana amatshatshazi akoNtuthu kudingwa elilodwa elizamela isabelo kumcimbi omkhulu ozalandela.

Umcimbi lo ozabona ukuncintisana kweziqabhobho zakoBulawayo ezileminyaka engu-18 kusiyafika ku-26 ngenhloso yokuphuma letshatshazi elizamelana lamanye ku-Miss Tourism Zimbabwe. Lelotshatshazi elizanqoba kuMiss Tourism Zimbabwe lizamela isizwe kumncintiswano wobuhle umhlaba wonke jikele kuMiss Tourism World ngenhloso yokwazisa umhlaba ngobuhle bemvelo yeZimbabwe.

UMthunywa ukhulumisane lomqoqi walumcimbi uSarah Mpofu-Sibanda othe amalungiselelo omcimbi lo asenziwe njalo uthemba amantombazana abalawo lomnyaka azaphakamisa ilizwe leZimbabwe ngokukhalipha langemvelo.

“Kulumnyaka sithole amantombazana akhaliphileyo njalo amahle angenelisa ukuphakamisa ilizwe leZimbabwe ngezemvelo. Lokhu kuyatshengisa ukuthi uMiss Tourism womnyaka lo esizamkhetha uzabe e-lit.

“Amalungiselelo sesiwenzile njalo abantu kababuye bazokuthi gwaqa lapho sigcoba itshatshazi lethu elihle lakoBulawayo.

Intatheli iphinde yakhuluma lomunye wamantombazana azaphatheka kumcimbi lo, uNatasha Gore othe sewulungele umcimbi lo.

“UMiss Tourism ngumncintiswano wokuthi iZimbabwe ithole umuntu wokwazisa ilizwe ngemvelo enhle yelizwe leZimbabwe kweze-tourism.

“Ngizibona ngifanele ukuthi nginqobe kulowumdlalo ngoba ngikwazi indimi ezinengi zakuleli ilizwe ezinjengesiNdebele, Shona, Venda kanye lesiNgisi. Lokhu ngamafitshane kutshengisa ukuthi ngizigqaja kanganani ngokuvela kwelakithi,” kuqhubeka uGora.

UHappiness Tshuma, yena owake wathola ithuba lokumela ilizwe kuMiss Tourism World uthe ubona angani lowumdlalo uzabalempumelelo enkulu.

“Sengithole amathuba okuhamba emazweni amanengi ngokuba yingxenye yaleli dili. Ngilethemba lokuthi ozanqoba lonyaka, ulethuba lokuthi amele iBulawayo emhlabeni wonke jikelele, enze isizwe sethu saziwe,” kuphetha uTshuma.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds