uMthunywa
SIYAHLANGANA njalo bafundi kule iviki, ngithemba liqhuba kuhle ezifundweni zenu. Kulabo abangakaqalisi ukulungiselela imihloliso yaphakathi komnyaka kumele liqalise lamhlanje njengoba lisazi ukuthi ithemu isiqunywe yaba mfitshane.
Kumaviki amabili aphelileyo sifunde ngenkanyezi, abanye benu benelisile ukutsho ukuthi inkanyezi ebezibuziwe yiziphi. Kuyajabulisa kakhulu lokhu, ngoba kuhle ukuthi umuntu angazikhombeli nje inkanyezi emkhathini kodwa aziqambe njalo ngamabizo azo aqondileyo.
1. Ikhwezi: Yinkanyezi ephuma empumalanga ngemva kwendonsakusa kukanti layo ikhanyisa njengayo indonsakusa. Le ukuphuma kwayo kubika ukuthi ilanga seliseduze ukuphuma.
2. Indonsakusa: yinkanyezi ephuma emadabukakusa, yinkanyezi ekhanyisa okwamagama, labo abathatha uhambo lwemadabukakusa babeqaphela ukuphuma kwayo sebesazi ukuthi yisikhathi bani.
3. Ingulube: lezi zinkanyezi ezintathu ezihamba zilandelana sizibona ngokuba kwazo ezansi kwesilimela ngobuthathu bazo.
Kule iviki sizakhumbuzana ukuthi izinto ezithile zazisenziwa ngani endulo.
Isibonelo: amatshakada enziwa ngomumbu
Chaza ukuthi kwenziwa ngani lokhu:
1. Umqungo 2. Ibhizha 3. Isijeza 4. Amasusu 5. Umfuma 6. Umcaba 7. Isikhupha 8. Isithubi 9. Ihiqa 10. Ububende.
Bafundi thumelani impendulo zenu kunombolo lezi 0773675473 ngeWhatsApp loba ngeSMS. Ufake ibizo lesibongo sakho, ukuthi ukuliphi ibanga lokuthi ufunda kusiphi isikolo. Thumela njalo lomfanekiso wakho. Kuphephandaba lakuviki ezayo sizafaka impendulo zakho kanye lezithombe zenu.
