uMthunywa
UNOZINTI weqembu leBaroka uElvis Chipezeze ubika ukuba ukuthwala kwakhe inkezo yeTelkom Knockout sekumfake kubanga labadlali abahlonitshwayo kweleSouth Africa.
UChipezeze ubeyinsika yokunqoba kweBaroka lapho etshaye khona iOrlando Pirates enkundleni yeNelson Mandela Bay Stadium, ePort Elizabeth, ngoMgqibelo ebusuku.
Umdlali lo wasuka kuChicken Inn kuleli.
“Ngizizwa ngijabule okuzwayo. Lokhe ngafika kuleliqembu, bengihlala ngihlose ukuthi ngenze izimanga lalo. Sekwenzakele ngokunqoba iOrlando Pirates. Sengibonakala lami njengonozinti kuligi le,” kutsho lumdlali ekhuluma lephephandaba likazulu.
Kusenjalo, abahlaziya inguqu yaseSouth Africa babika ukuba iBaroka ibeyisibonelo esihle sokuthi nxa ukholelwa entweni ethile, icina yenzekile, kungakhathalekile ukuthi bewubukelwa phansi kanjani.
Leliqembu laseLimpopo lephule inhliziyo zabalandeli be-Orlando Pirates liyiqumba phansi emdlalweni wenkezo yeTelkom Knockout (TKO) Bekungokokuqala iBaroka idlala ku-final selokhu yanyukela ku-Absa Premiership. Ngo-2014 iBaroka isadlala kuNational First Division (NFD) yafinyelela kuhlandla lama-semi final aweNedbank Cup.
IBakgaga ba GaMphahlele icitshe yadliwa lizembe ngesizini edluleyo, ngakho akekho obeyithemba ukuthi ingatshaya iqembu elikhulu. Ngaphandle kwalokho iPirates ivutha ingabaselwanga selokhu kuqale isizini.
IBucs ayilayo inhlanhla uma kukhulunywa ngeTelkom Knockout. Isidlale kulesi isibanga seTKO kasitshiyagalolunye kodwa iyiphakamise kanye kuphela.
Ngesikhathi efika uWedson Nyirenda, oqeqetsha iBaroka, uthe ufuna ukunqoba indebe leqembu okuyinto abayithathe njengehlaya abanengi.
IBaroka iye kulumdlalo ingakaze idedele ibhola okuyinto elethe ukuzethemba kubadlali labalandeli.
Emdlalweni wangoMgqibelo yiyo ebilokhu ihamba phambili njengoba umdlalo ucine uphele ngo 2-2 emizuzwini engu-120.
UNyirenda utshintshe izinto kuBaroka njengoba itshaye iMamelodi Sundowns, Bidvest Wits LeLamontville Golden Arrows ngaphambili kokubhekana lePirates kuTelkom Knockout. Okubalulekileyo manje kuBaroka yikuthi ithole impumela enhle ku-Absa Premiership, ukuze ingazitholi ibhekene lezembe ekupheleni kwesizini.
Leli qembu liyibambe endaweni yesi-14 kungalane okuyindawo ethanda ukuba yingozi.Mhlawumbe ukunqoba iTelkom Knockout kuzoyenza ivuke emaqandeni lasemidlalweni yeligi.
