UYALA UMUDUHWA

UYALA UMUDUHWA

0 432
uPeter “Biya” Muduhwa

YiNtatheli kaMthunywa
UMDLALI weHighlanders uPeter “Biya” Muduhwa usebike ukuba abantu abahlaliseke ngoba usasekhona kuqembu.

Lokhu kuza ngemva kokuthi umqeqetshi weChicken Inn uJoey Antipas eyibeke mgceke inhloso yakhe yokufuna ukuthenga umdlali lo.

Agcwele phamu amahemuhemu ebulenjini lasembikweni ethunyezwa kuMthuywa ukuthi kuseduzane ukuthi iChicken Inn imnike umsebenzi.

Kulindwe ukuthi kucace ukuthi inkulumo lezi zimi njani nanko phela leHighlanders iyavilapha ukukhulumisana labadlali bayo uMpalakazi engakafiki.

Ekhuluma lentatheli kaMthunywa uMuduhwa uthe uzazi esagqoke ijesi leTshilamoya.

“Konke lokhu okukhulunywayo angikwazi, ngikubala emaphepheni. Ngamanga aluhlaza lawa ukuthi mina kusizini ezayo ngizadlalela enye ithimu. Akukho lokukodwa engikwaziyo ngakho.

“Okwakhathesi kunengi engikukhangelele ukuthi kwenzakale leqembu lethu esilithandayo. Kuyisifiso sami ukuthi ngithwale inkezo yeligi ngikuBosso.

Uthe uyakholwa kubuqeqetshi bukaMadinda Ndlovu ngakho uzafuna ukuba yingxenye yeqembu elizasukumisa abalandeli mhla beyithwala inkezo yeligi.

“Wonke umdlali ufuna ukudlalela iBosso. Kuyinhloso yethu sonke ukuthi sibezintshantshu.”

Uqhubekele phambili ekhuthaza abalandeli ukuthi bengahlamukeli iqembu nxa kungathi kunzima. Uthe imidlalo ayikapheli ngakho ithuba lokuthi babezingqungquthela zenkezo kuwonalo umnyaka baseselalo.

Uphethe ngokuchazela iphephandaba ukuthi iqembu leBosso liqembu elihloniphekayo njalo elilendlela yayo yokwenza izinto ngokuhleleka.

Uthe ukuthi yena uyathengiswa kusemandleni eziphathamandla eziyizo ezibona ukuthi sevuthiwe kumbe sefanele ukuthi ayedlala kwenye indawo noma cha.

“Iqembu leli lihlelekile. Ngeke ngiziphawulele ukuthi sengifunani. Iziphathamandla yizo ezibona konke. Okwami ngingumdlali webhola ngenza lokho umqeqetshi akhangelele ukuthi ngikwenze ukuze iqembu linqobe,” kuphetha uMuduhwa.

SIMILAR ARTICLES

NO COMMENTS

Leave a Reply