Uyakloloda uBaxter

14 May, 2015 - 13:05 0 Views

uMthunywa

YiNtatheli kaMthunywa
UMQEQETSHI weKaizer Chiefs Stuart Baxter uthe yena ungungqondongqondo weligi yeAbsa Premiership njalo uzitshayela izandla ngokudla ubhedu ngabadlali abakhethe kusizini esanda kugqitshwa lapho iqembu lakhe elihluthune inkezo.

UBaxter utsho kanje ekhukhumeza iKaizer Chiefs yona eyethweswe umqhele ngokuba mgumpetha we-Absa Premiership ka-2014/2015, yephula inqwaba yamarekhodi.

Ngokutsho kukaBaxter, okuyikhona okumsize ukuthi adle isicoco sakhe sesibili leChiefs eminyakeni emithathu, ngabadlali ababalisa uSiphiwe “Shabba” Tshabalala, Reneilwe Letsholonyane, Tsepo Masilela, Siboniso “Pa” Gaxa loBernard Parker.

UBaxter ubabaze ukudlala kukaTshabalala wathi nguye obeyikhiye yokuvala umkhandlo wababhola afinyelele abagadli phambili. Umqeqetshi lo uthe ukuzimisela kwabadlali bakhe yikho okwenze baqede isizini ngomfutho
Ngesikhathi kuqala isizini ephethwe ngempelaviki, bekuqonqoselwa ukuthi abadlali baguqule indlela abadlala ngayo ikakhuku nxa bedibana lezitha ezindala i-Orlando Pirates leMamelodi Sundowns.

UBaxter uthe bekubafaka umfutho yena labadlali ukuzwa kuthiwa iChiefs ngeke yenze lutho kulisizini ngoba ayizange iqinise abadlali bayo njalo ilenqwaba yabadlali abathathwa njengabadala.

Lapha bekukhulunywa ngabadlali asebedonsela iminyaka yokuzalwa engu-30 ababalisa uTshabalala, uParker, uGaxa, uKatlego Mphela, uMorgan Gould labanye.

“Indlela esinqobe ngayo ibingacatshangelwa ngumuntu ngoba sinqobe ngabadlali obesekuthiwa kuphelile ngabo. Akekho umuntu oziqhenya njengami ngoba abadlali bangenze umqeqetshi ongcono. Besekukhulunywe kakhulu ngabo kodwa konke okubekwe phambi kwabo kulisizini bakuthethe kalula,” kutsho kanje uBaxter ekloloda.

Ukuhamba kukaKnowledge Musona lakho kwenze abanengi bayibona isixega kakhulu iChiefs phambili kodwa uBaxter ubelokhu ebasekela njalo abadlali bakhe ngokuthi bazomenzela lokho akufunayo.

“Ngesizini ezayo sizabuya sesihluke kakhulu. Sizaqinisa ezindaweni ezinengi kodwa ngeke silidilize iqembu ngoba sizwa abantu bekhuluma ngeminyaka yabadlali bethu, ” kuqhuba uBaxter.

Amakhosi avale isizini elemali kulandela ukunqoba i-MTN 8, i-Q1 le-Q 4. Imqhudelwano le ibalelwa kuR10 million. Phezulu kwalokhu, iChiefs ithwale isicoco sePremiership. Yiyo futhi ezamela iSouth Africa kuCaf Champions League kanye leSundowns.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds