uMthunywa
Mthokozisi Dube
IQEMBU leCaps United lilakho ukudilika loba nini nxa inkokheli zayo zingehluleka ukudinga usizo, kutsho umqeqetshi uMark Harrison.
Umqeqetshi lo ubikele uMthunywa ukuthi lokhe waqalisa ukuphatheka kwezenguqu, kakaze atshayisane leqembu elinjenge Caps United, “elilambisa” abadlali balo.
Umqeqetshi lo ubike njalo ukuba yena waqala umdlalo kanobhutshuzwayo eleminyaka yokuzalwa engu-16 okwamanje seleminyaka engu -4 kodwa kakaze ahlangene lokwenzakala kuCaps United.
Uthe ukuswelakala kwemali kanye lokungathembeki kwenkokheli zayo yikho okuzadiliza iqembu.
Ekhuluma lephephandaba likazulu eseWhite City, uHarrison ubike ukuba kusele nje amaviki amabili ukuba iqembu leli livalwe.
“Nxa bengalungisanga udaba lwemali yabadlali, ithimu kayisoke iyendawo kulisizini. Ngokubona kwami iCaps United ingatshabalala kumaviki amabili alandelayo.
“Siphose sehluleka ukuzodlala ku-Independence ngoba abadlali bethu befike koBulawayo ngehola lika-2 ekuseni mhla welanga lokudlala, kukanti thina njengabaqeqetshi safika lapha ngehola lokuqala emini ngenxa yokuswelaka kwemali,” kuveza uHarrison.
Umqeqetshi lo owake wasebenza kuligi yenguqu yelizwe leSouth Africa uthe uhlezi esevalweni lokuthi ngelinye ilanga uzangena emdlalweni eyedwa ngoba abadlali sebekhalalile.
“Eqinisweni angazi ukuthi abafana laba kulinyanga bazayithola yini imali yabo.”
ICaps United ibiseWhite City ngempelaviki edluleyo lapho edibane khona leZPC Kariba yanqotshwa 1-0 emdlalweni wokudinga iqembu lesithathu lelesine kunkezo kazibuse.
“Isimo esikiso sesifuna ukuba uHulumende, iZifa kumbe abenelisayo bangenele kungakho ngibize umhlangano lenkokheli zeqembu kusasa (uMvulo) ukuba kukhulunywe ngodubo lolu,” kubika uHarrison.
“Abafana balesifiso sokudlala kodwa awungeke ulidlale ulambile ibhola njalo nxa sikhangele kulabafana ababalisa uBlessing Nyamuzihwa abaleminyaka engu-17 bona abalekusasa elikhanyayo.”
Ebuzwa zintatheli ukuba kungaqhubeka kunje uzahlala na ngoba evela emaqenjini abemphethe kuhle, uHarrison ubike ukuba usakha iqembu elizakuba ngumlilo eminyakeni emithathu ezayo.
Kusobala nje ukuthi umqeqetshi lo ucatsha ngomunwe kodwa uyahamba njalo isizatho asinikayo asilasisindo ngoba inengi lamaqembu aku PSL liqale ngabaqeqertshi ababatsha njengaye. Kusenjalo abalandeli beqembu leMakepekepe sebebike ukuba balesifiso sokuncedisa iqembu labo kodwa uTwine Phiri akaphumele egcekeni ukuthi imali akalayo.
