uMthunywa
Musa Janga
KULABOWINDI besigabeni seManoti eGokwe abatshiye izihambi ebezisesilindweni samabhasi kuviki ephelileyo zibambe owangaphansi kulandela ukuhlaselana ngamabhemba bebanga i35cents.
Owindi laba, uReward Ncube lo Eddy Maphosa kubikwa baphiwe i-35cents le eyabaxabanisayo ngemva kokumemezela umtshova.
Esinye isihambi esikhulume loMthunywa uMnumzana Munyaradzi Moyo ubike ukuthi owindi laba ngemva kokubhadalwa i35cents behluleka ukuyabelana bacina sebesilwa.
Kubikwa uEddy wakhulelwa nguReward ngokucwayiza kweso wadobha ibhemba wamtshaya ngayo wamlimaza iqolo encedisana labangane bakhe.
“Ababili laba bebememezela umtshova basebephiwa i35cents kwehlula ukuthi bayabelane basebeqala ukulwa. UReward ulalisiwe esibhedlela ngemva kokuhlaselwa kwakhe nguEddy labangane bakhe.
“Utshaye uReward ngebhemba eqolo encediswa ngabangane bakhe, ulimele sibili ngoba usesibhedlela.
Indaba le isisezandleni zamapholisa njalo uEddy kanye labangane bakhe lokhu besadingwa ngamapholisa.
Imizamo yokukhulumisana lo Reward yehlule ngoba ucingo lwakhe lungangeni.
UMthunywa uxhumane lesikhulumi samapholisa esabelweni seMidlands uInspector Ethel Mukwende yena obike ukuthi udaba lolu kalukafiki ewofisini yakhe.
