uMthunywa
YiNtatheli kaMthunywa
INTSHANTSHU zeligi yeCastle Lager iFC Platinum zibika ukuba sezikhuze uvalo ngakho zizalwela ukuthi zifike kuhlandla le-final yenkezo yeCaf Champions League, ehlanganisa ingcitshi zeAfrica.
Umsekeli womqeqetshi kuleliqembu lezimbamgodi uLizwe Sweswe wazise ukuba abethuki lutho loba bechinsa ukuyadlalela kunkundla eziphezulu.
USweswe owazakala kabanzi ngomsebenzi omuhle awenza kuqembu leTsholotsho ngokulifikisa kuPremier Soccer League, uxoxe lalintatheli ngamalungiselelo abo andubana bayedibana leqembu lase-Angola ele-Desportivo de Agosto.
“Siyalungiselela sibili njalo asitshiyi lutho emuva. Abadlali bethu sesilabo, sikhangelele ukuqala ukulolonga ngoMvulo.
“Asethuki lutho ukuyancintisa kuChampions League ngoba lathi siliqembu elesatshwayo,” kutsho umqeqetshi lo.
Uthe ukuncintisa kuCaf Champions League akutsho ukuba bazayekethisa ukwenza kuhle kuligi yakuleli.
“Sifuna ukuqina ngamandla kulisizini. Siyazi ukuba kungumthwalo ukudlala kumaligi amabili.
“Lonyaka sizadlala inguqu engcono ngoba sihlose ukuqeda sizintshantshu futhi. Iphupho lethu ngelokuthi siphatheke kumidlalo yenkezo ekholiswa ngamathimu aqeda isizini ephezulu. Siyithimu enkulu, angeke kusehlule lokhu.”
Iqembu leli lidlale kakuhle kusukela laqala ukuncintisa kuligi ephakemeyo kuleli. Phose kumasizini amathathu ibiqeda ikunombolo yesibili kumbe eyesithathu.
Ngokuqhatshwa kukamqeqetshi uNorman Mapeza loSweswe, iFC Platinum ikhuphukile yatshintsha umdlalo, okuyikhona okuyincedise ukuthi ithwale inkezo.
Ukungena kukaMkhokheli Dube kuqula labagadli baleliqembu kwenze abadlali bababukhali phambili kwegedi.
