Uvalo kuBosso, otsheketsha babaleka lenkezo

17 May, 2018 - 00:05 0 Views

uMthunywa

Nkosilodumo Ndebele
LUTSHAYA lasentanyeni uvalo kulabo abathi bangabalandeli beHighlanders nxa bebuzwa imbono yabo ngomdlalo wangeSonto.

IBosso yehluleke ukubhoboza igedi leYadah Stars ngempelaviki edluleyo. Phambili kwalumdlalo, iqembu likaMadinda Ndlovu litshaywe yiZPC Kariba nge 2-1 eMagumeni. Loba bekhuluma bencoma ithalenta labadlali, abalandeli asebeyibonile “iECD” babike ukuthi kumele kubotshwe ijombo.

Akwaziwa ukuthi izaphuma iphetheni iECD le mhla isamukela iCaps United kumdlalo wetshumi lambili weCastle Lager.

Lokhe yaqala ukutshengisa ukuthi imi njani enkundleni, ithimu kaMadinda isihuge abasekeli bakaMantengwane ukuthi bagcwalise inkundla. Inani lababukeli lisondelela ku10 000 kumidlalo yonke.

Balovalo kodwa balethemba lokunqoba abalandeli beTshilamoya abaxoxe lephephandaba likazulu kuliviki.

ICaps United layo ingena kulumdlalo ihluzukile ngemva kokunqotshwa ngotsheketsha iNgezi Platinum ngempelaviki edluleyo okuyikho okubapha intshukuntshu.

Izimbamgodi zePlatinum lezi sezikhokhele ilogu kungelaqembu elilwisana lazo.

Ngokufanayo, iBosso yadliwa ngotsheketsha laba.

Abalandeli beTshilamoya baveze ukuthi balethemba lokuthi iTshilamoya izanqoba kuliviki ngenxa yokuba bengehluleka kungabulala amathuba abo okuthi benqobe kusizini yalonyaka.

“Kuqakatheke kakhulu ukuthi senelise ukunqoba kumdlalo wangeSonto ngoba ukudliwa lokhu kubulala amathuba ethu okunqoba kulisizini. Kudala sacina ukunqoba, ithemba lethu selikuMadinda labafana bakhe abancane laba ababizwa ngokuthi yi ‘ECD’ ukuthi basijabulise lonyaka,” kutsho umlandeli omkhulu weBosso uNkosilomusa Manzini olilunga labasekeli abakoBulawayo.

“Thina esikufunayo yikunqoba hayi ibhola elihlabusayo ukubukela kodwa lingela mpumela,” kutsho uManzini.
Loba kunjalo uMadinda “Khathazile” Ndlovu uxwayise abadlali beBosso ukuthi bedlale ibhola elihlabusayo ukubukela okungadonsa amahlabezulu wonke ukuzobukela ibhola elithokozisayo.

Lokhu ukukhulume ngemva komdlalo wabo abawudlale leYadah FC ekamfundisi omkhulu uWalter Magaya owebandla leProphetic Healing and Deliverance Ministries (PHD) ngempelaviki edluleyo eHarare, lapha athi unanzelele ukuthi abafana bebelambele ukuhlohla okubenze badlala ibhola elingahlabusiyo kubabukeli.

Uveze ukuthi abafana vele sebeqeqetshile ngokuthi benelise ukuba seqenjini lakhe ngenxa yokuthi inengi labo belidlala kuligi encinyane ngesizini edluleyo.

Bekulithuba labo lokuqala lokwehluleka ukunqoba kweleHarare ngemva kokunqoba iDynamos leHerentals ngamaviki adluleyo.

Kuviki edluleyo inguqu iphele kungela manqoba, ngemva kokuba iYadah itshengise ukuthi iyinkunzi ngakibo, ngeke inqotshelwe esibayeni sakibo kweleHarare.

“Lingizwe kahle. Angikhulumanga ngempumela yomdlalo wangoMqibelo kumbe ngokuthi bekumele sinqobe.”

“Ngikhulume ngokuthi iqembu kalidlalanga inguqu ehlabusayo okuyiyo esifuna idlalwe yiTshilamoya. Sifuna ukudlala ibhola elilempumela enhle njalo elimnandi ukubukela okuyikho okungabisa abantu ngobunengi enkundleni yebhola ukuzobukela, lokhu yikho engikufunayo,” kutsho uNdlovu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds