uMthunywa
NguCharity Moyo lo Ethel Ncube
KULOKUNGEZWANI phakathi kwamalunga enye imuli yeSamlodi, eGwanda nanko phela kubikwa ukuthi asephoselana inyoka okucatshangelwa ukuthi isiqede abantu.
Inyoka le eyabonakala ilahliwe iphakathi kwesaka ngeviki ephelileyo kucatshangelwa ukuthi ngekaRosina Msimanga ongubabakazi walumdeni.
Kuzwakale ukuthi amalunga emuli le asehlala ethwalelane induku lamahloka kubangwa umgobho abacabangela ukuthi ngokaRosina kukanti abanye bathi ngowomunye umalukazana.
Esinye isakhamuzi sakule indawo UMnumzana Edwin Ndlovu uveze ukuthi kuyisimanga ukubona abantu bemuli yinye behlala bedlephana.
“Okumangalisayo yikuthi umdeni lo ulezimfa ezingapheliyo njalo ezingazwisisekiyo.
“Ukuphela kwamalunga emuli le kwenza bacina bephuma ijumo besiya kubosiyazi ukuze bazi ukuthi ngubani isitha sabo.
“Kubosiyazi kulapho ithumba elabhoboka khona ngoba bavumbulula imfihlo yokuthi kulomunye wabo olenyoka eqeda abantu emulini,” kutsho uMnu Ndlovu.
UMthunywa wenelisile ukuxhumana lamanye amalunga alo umdeni abalisa uFanyana Msimanga (87) lomkakhe uEbelina Msimanga bona abaveze ukuthi indaba yenyoka ngeke benelise ukukhuluma ngayo nxa abanye bengekho.
Baqhubekele phambili besithi ngeqiniso abantu bayaphela emulini kodwa bacabangela amalembu amadlozi athathwa ngumfowabo uBill.
“Asingeke senelise ukukhuluma ngendaba yenyoka abanye bengekho.
“Silenhlupho ezinengi ezokufelwa kodwa thina ngokwethu sibamba kakhulu amalembu amadlozi athathwa ngumfowethu wawagebhela phansi,” kutsho uFanyana.
Babuye baveza njalo ukuthi inyoka yabonakala ngemva komuzi kaRosina. Kuvele njalo ukuthi abantwana besikolo yibo abaqala ukuyibona ifakwe phakathi komgodla wesamende kodwa iphila.
Inyoka le kubikwa yaqeda iviki ilokhu ingemva komuzi lo.
Kuzwakale ukuthi uRosina walanda uFanyana lomkakhe wabazisa ukuthi ulandwe yizakhamizi zisithi akhuphe inyoka yakhe endleleni ngoba abantwana sebesesaba ukuya esikolo.
UNkosazana Msimanga uqhubekele phambili esithi:
“Thina udaba lwenyoka salwaziswa ngubabakazi yena owasitshela ukuthi abantu bathi kasuse inyoka yakhe emgwaqweni ngoba abantwana besikolo kabasakhululekanga ukuya esikolo ngoba yayisendleleni.
“Waveza ukuthi inyoka leyo ngeyakhe kodwa wathi kulenye ehlala emzini kaBilly njalo ihamba isidla emizini yabantu”.
Intatheli zenelise ukukhulumisana loRosina ngale indaba yena obevuma aphinde alandule ukuthi inyoka wayibona.
Uveze ukuthi laye wezwa abantu besithi kwakulenyoka ngemva komuzi wakhe kodwa yena wayengekho eyevuna eGuyu.
“Indaba yenyoka ngayizwa ngabantu ukuthi yayikhona kodwa ngangingekho ngiyevuna eGuyu, bathi bona yaqeda iviki isesakeni endleleni esethangweni lomuzi wami.
“Ngilapha ngiyesaba inyoka engayibonayo yayinkulu bantwabami.
“Yayiphakathi komgodla iphefumula, lokho ngazalwayo sengize ngigugile angikaze ngiyibone inyoka engako”, kuveza uRosina.
Uqhubekele phambili esithi inyoka ikhona sibili kodwa nxa bedingisisa ukuthi ngekabani kubanjwa abafowabo ngoba beyibo abanikazi benyoka le.
URosina ubikele uMthunywa ukuthi sewafelwa ngabantwabakhe bonke njalo babulawa yikumunywa igazi ngumgobho lo.
“Abafowethu labo bayakwazi ukuthi yibo abagangileyo ngoba singaphuma sonke bayabanjwa zinyanga, batshelwa ukuthi kabangikhuphe abangibelethisa khona kodwa bona bayala,” kutsho uRosina.
Uqhubekele phambili wathi okunye okumangalisayo yikuthi uhlala ebona umzila wenyoka le egumeni lakhe kodwa yona engayiboni.
Omunye umfakazi ohlala kulesisigaba oziveze ngokuthi nguMaNcube uthe yena inyoka le wayibona laye ingemuva komuzi kaRosina.
Uthe wabizwa ngabantwana besikolo ukuze azoyibona.
Ubike ukuthi yayiphakathi komgodla njalo yayikhuphe ikhanda layo phandle.
“Mina ngayibona ngoba abantwana besikolo bangibiza ukuze ngiyebona isimanga lesi, ngatshaywa luvalo ngesikhathi ngibona umgobho ugcwele emgodleni we50kg ubotshiwe kodwa ukhuphe ikhanda,” kubika uMaNcube.
Kubikwa ukuthi udaba lolu lwabikwa enduneni uDaniel Nhlamba yena owabapha imvumo yokuthi behlanganise imali ukuze benelise ukuyadingisisa kubosiyazi ngodubo lwabo lolu kulokuthi bahlale becabangelana.
