uMthunywa
YiNthatheli kaMthunywa
Kulenina lelokitshini lePumula North koBulwayo elitshontshele umkalo imali engange$300 kunye lempahla qede latshaya utshani layatholakala kwenye ibhawa selingumahotsha.
Isiga lesi senzakale kuyonale inyanga lapho uAbigail Mabhena (23) abalekele khona umkakhe uJohn Gumede ngemva kokumtshontshela i$300, umakhalekhukhwini kanye lezinye impahla wasuka lapho wayakuba ngumahotsha ebhawa yeBaku.
UMthunywa uxhumane lesinye sezakhamizi zakule indawo uNkosazana Mildred Ncube ochaze ukuthi uMabhena uvele uhlezi ebalekela indoda esiyakuba ngumahotsha.
“UMabhena ubehlala ehamba ebhawa nxa umkakhe engekho kodwa umkakhe besingakaze simazise ngakho ngoba sisesaba ukuthi sizabaxabanisa. Khathesi ngikhuluma nje kuthiwa wabaleka etshontshe imali kanye lomakhalekhukhwini womkakhe.
“Umkakhe wezwa kuthiwa ubonakala ebhawa yeBaku wasemlanda wayamthola wabuya wambalekela njalo engamhlawulanga imali yakhe ayitshontshayo,” kutsho uNkszn Ncube.
Intatheli ibuye njalo yaxhumana loMnumzana John Gumede wavuma ukuba umkakhe wambalekela etshontshile njalo uyamdinga.
“Kuliqiniso sibili ukuthi umkami wangibalekela ngemva kokutshontsha imali kanye lempahla zami. Ekubalekeni kwakhe wasuka ngingekho ngathola ewatshe wa-ayina impahla zami wazibeka kuhle ngathi mhlawumbe uye kweyinye indawo uzaphenduka.
“Kusenjalo ngananzelela ukuthi utshontshe imali yami i$300 kanye lomakhalekhukhwini engamthenga nge$150 ngahle ngabona ukuthi sebalekile,” kutsho uMnu Sibanda.
Uqhubekele phambili wachaza ukuthi ngemva kwalokho wamlanda wathola kodwa waphinda wambalekela.
“Ngemva kweviki ngezwa abantu bethi bayake bambone ebhawa yeBaku ngasengisiyafika khona ngamthola ekhona wasengibalekela. Ngaqhubeka ngimdinga saze savumelana sabuya endlini kodwa wathi ufuna ukuyathatha imali yami lempahla azigcinisa kuyisekazi azongipha ngoLwesibili kuyonale iviki kodwa kazange aphenduke.
“Ngikhuluma nje lakhathesi lokhu ngimdinga ukuthi ngimbophise ahlawule imali lempahla zami,” kuphetha uMnu Gumede.
Imizamo yokukhulumisana loMabhena yehlule ngoba ucingo lwakhe belungangeni.
