uMthunywa
Edson Khumalo
ILANGA lize lagwaza umhlaba isela lemibhida lilokhe lidinga isango lokuphuma esivandeni selokitshini leMganwini koBulawayo ngeSonto.
Kubikwa kuze kwasa isela leli lilokhu libhoda phakathi kwesivande lingasaboni sango elingene ngalo.
Ekhuluma lentatheli kaMthunywa uMnumzana Gabriel Moyo ongomunye wezakhamizi ezilimileyo esivandeni lesi uchaze ukuthi isela elaziwa ngokuthi nguTony libonakale lizulazula njengo moya omubi lidinga isango lokuphuma.
“Sithe sifika esivandeni sisiyathelela sathola umfana lo ekhanya angani uthwele nzima kasazi lokuthi enzeni. Ubezulazula okumuntu odinga isango lokuphuma kodwa engalitholi ngapha ethwele umgodla ogcwele umbhida lamatamatisi,” kutsho uMnu Moyo.
Kubikwa umfana lo ebona abantu befika kazange azame ukubaleka, umane wama nje.
“Uthe ebona sifika kazange azame ukubaleka ngoba vele ubengani kasaliboni isango, umane wazimela wathi ntsi,” kuchaza uMnu Moyo.
UNkosazana Methembe Mguni uchazele intatheli ukuthi kungenzeka ukuthi lujaha utshontshe esivandeni esilungisiweyo.
“Iqiniso elikhona yikuthi abantu asifani, singaze silime sonke ezivandeni lapha sehlukene kakhulu.
“Umfana lo ngabona ubeseswela ukuthi aphume ngaphi ngoba isivande atshontshe kiso singabe salungiswa. Akula enye ingcazelo engabangcono kulale,” kulandisa uNkszn Mguni.
Ngokufika kwabantu kukhanya kusuke kwathi dlwe kumfana lo wamane wathalaza andubana adliwe ngumswenya. Izakhamizi kubikwa zikubone kungcono ukuthi zingayibiki emapholiseni lindaba ngoba zithi ujeziswe kwenela umfana ngokuzulazula mhlawumbe ubusuku bonke esivandeni.
Umgcinisihlalo kazibuthe uMnumzana Innocent Tangawamira uthe isehlakalo lesi kumele kube yisibonelo kubo bonke abafana abalengqondo yobusela.
