uMthunywa
KUTSHINTSHE ukukhuluma kumqeqetshi weMamelodi Sundowns, uPitso Mosimane, ebanjwa ekhaya yiBloemfontein Celtic emdlalweni we-Absa Premiership.
ISundowns, esiphambili ku-log yePremiership iphume lemiklomelo ikhangelane leCeltic eLoftus Versfeld Stadium ePitoli. Ngokwehluleka ukuthola imiklomelo yonke, iSundowns ilahle ithuba lokuvula igebe esiqongweni se-log kwazise iBidvest Wits icine ikhale ngaphansi kuCape Town City. Endaweni yesibili sekuhlezi i-Orlando Pirates ehlule iLamontville Golden Arrows. Amaqembu asehlukaniswe ngumklomelo owodwa.
Ngesonto eledluleyo, emuva kokuthi bedlale ngokulingana leWits, uMosimane uthe nxa benganqobi kungcono bengahlulwa ngoba umklomelo abawutholayo kukhona lapho ozabasiza khona. Ukhulume lokho emuva komdlalo leCeltic.
“Ngihlala ngitsho kanjalo kodwa lamuhla angijabulanga. Lamuhla bekufanele sinqobe. Silahle imklomelo emibili. Sizobona ukuthi muhle umklomelo kumbe cha ngoba ngeke wazi. Amaqembu asazophucana. Lathi ngeke siyinqobe yonke imidlalo,” kutsho uMosimane.
Ngaphandle kokukhokhela umjaho weligi, iSundowns isemkhankasweni wokuwina indebe yeCaf Champions League. Isethubeni lokudlulela kuma-quarterfinal.
“Okungijabulisayo yikuthi sikwazile ukutshintsha abadlali futhi sagcina indlela yokuhlasela esidlala ngayo. Senze inguquko eziyisithupha emuva komdlalo leWits kodwa sakwazi ukudlala kahle sanqoba sidlala leCity. Ngijabule ngalokho ngoba imidlalo iyalandelana manje ngokuphangisa. Kithi alikho ithuba lokuphumula,” kutsho uMosimane.
“Kuzoba ngumdlalo onzima laphaya. Umdlalo ohluke kakhulu ngoba abahlali emuva. Abazange bahlale emuva sidlala imidlalo yonke ngakho bengahlala kanjani emuva nxa sebedlalela ekhaya. Zizobe zithengana. Loba ubani ozosebenzisa amathuba uzowunqoba umdlalo. Kodwa sizoya kahle, singanyukelwe yimimoya. Luselude ukhalo,” kutsho uMosimane. — Ubulembu
