Uncategorized

Utsheka umlomo etshaywe yinkosazana

13 Dec, 2018 - 00:12 0 Views
Utsheka umlomo etshaywe yinkosazana

uMthunywa

Ethel Ncube
ZISELE zibambe owangaphansi izakhamizi zeNtalale Gwanda ngemva kokuba enye indoda itshaywe yinkosazana yatsheka umlomo.

Isiga lesi senzakale ngempelaviki lapho uMnumzana Keinas Ndlovu ehlelwe khona ngamashwa la.

Esinye isakhamuzi esikhulume loMthunywa uMnumzana Owen Siwela uveze ukuba abalankani ngokwenzakala kumakhelwane wabo.

“Ngabizwa ngabantwana ukuthi ngizebona, ngathola uNdlovu ethe daca phansi kuthiwa utshaywe yinkosazana. Okubuhlungu yikuthi umlomo watsheda kancane okusuka kube yingxaki ukuthi kwahamba njani.

“Lapho atshayelwa khona kwakuqothukile kungokunye kuvuleke umzila angathi ngumgelo. Isenzo sakhona silenkulumo phakathi, ngoba sazi ukuthi inkosazana iyatshaya umuntu kuphela hatshi ukuthi aze atsheke umlomo, lokhu siyakuqala.

“Ngikhuluma nje ukukhuluma uyakhuluma kodwa ilizwi aliphumi kuhle,” kubika uMnu Siwela.
Intatheli ixhumane lomunye owabuya ezobona ngesikhathi kusanda kwenzakala ingozi le uNkosazana Lethu Sibanda oveze ukuba abalankani ngamashwa la.

“Lezulu lakhona asizange silizwe liduma kodwa sezwa sokuthiwa inkosazana siwonile. Leli ngelomuntu sibili, akudingwa lokhu. Lapho elalimtshayele khona kwakungokunye angani ngumuntu obegebha phansi.

“Ukhona umuntu owamthumelayo ukuthi liyemtshaya laye sekumele abambe ziqine ngoba bazacina bemqothula mpela. Sicabangela ukuthi kungabe kukhona akwenzakalayo okungayisikho nanko phela inkosazana isitshaya umuntu atsheke umlomo,” kubika uNkszn Sibanda.

Iphephandaba likazulu lixhumane loMnu Ndlovu ovumileyo ukuba kulengozi enjalo eyamehlelayo.

“Ukulandisa kuhle ngeke ngitsho konke kodwa kwaphazima kanye ngezwa angani ngibanjwa ligetsi kanti ngumbane wangilahla phansi. Phansi kwasala kugebhekile kwaba ngokunye lomlomo wasala ususeceleni.

“Kukhona okutshaya amanzi ngesiga lesi kungakho kumele sibuyele kumnikazi masinyane nje,” kutsho uMnu Ndlovu.

UMthunywa ukhulume lengcitshi kwezamasiko uMnumzana Timo Mabhena oveze ukuba inkosazana iyabulala kayitshiyi umuntu ephila.

“Umbane nxa ukutshayile uyakubulala nxa usilile uyabe utshaye eceleni kwakho hatshi umuntu ngokwakhe. Okokutsheka umlomo kayisiyo nkosazana uyabe etshaywe yizithuthwane (mild stroke),” kuphetha uMnu Mabhena.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds