uMthunywa
Ethel Ncube
KULESELA lembuzi leNtalale eGwanda eligebhe igodi lakhafula amathe lathi ngeke liphinde ukutshontsha nanko phela lisele lithoba amanxeba ngemva kokutshaywa ngumbane.
Insindabaphenduli le yenzakale ngoLwesihlanu kuviki ephelileyo lapho uBonang Ndlovu atshontshela esinye isakhamuzi imbuzi andubana atshaywe unyawo ngumbane.
Ekhuluma loMthunywa uMnumzana Calvin Moyo uchaze ukuba uNdlovu lo ubesehluphile ngobusela esigabeni.
“UNdlovu wabuya lembuzi ezithengisa evela eBeitbridge, sabuzana ukuthi uzithethe ngaphi yena engelazo.
Ngemva kwensukwana ezimbalwa izulu lathwala njalo kalizange lidume ngitsho kodwa sezwa sekuthiwa uNdlovu usetshaywe ngumbane,” kubika uMnu Moyo.
Uqhubekele phambili esithi kungenzakala ukuthi uNdlovu wayethunyelwe umbane ngumnikazi wembuzi ayezithengisa.
“Lokhu kuyasimangalisa ukuthi izulu lingadumanga uzwe kuthiwa kulombane otshaye umuntu. Okuhluphayo yikuthi lapho atshayelwa khona wayehamba lembuzi zahle zabaleka azizange zibonakale futhi,” kubika uMnu Moyo.
Intatheli iphinde yaxhumana loMnumzana Bonang Ndlovu owatshaywa ngumbane ovumileyo ukuthi walimala.
“Nxa ngatshaywa ngumbane wena ufunani kukho? Izihlobo zami yizo okumele zingibuze hatshi umuntu kodwa. Ubufakazi bokuthi ngatshontsha bungaphi abantu bangiphosa ngombane sebecatsha ngembuzi zami lazo ezahle zabaleka sengilimele.
“Angithathi lutho lomuntu mina njalo okwezulu lokhu ngiyalibisela kumnikazi, angifuni bantu abadlala kubi mina,” kuphetha uMnu Ndlovu.
