uMthunywa
Msilisi Dube
IZAKHAMIZI zelokitshini leNkulumane edolobheni lakoBulawayo zibukele ibhayisikopo yamahala ngeviki edluleyo ngemva kokuba enye indlamanzi itshaye umkayo qede yamnikela ngezinja ngoba ebuye phakathi kwamabili.
Umsolwa uJoel Musekiwa oleminyaka yokuzalwa engu-26 kubikwa utshaye umkakhe njalo engumamangala uClara Gwebu (20) ngoba ehambe lamakhiye waze waphenduka ebusuku.
Umtshutshisi wecala leli ubikele umthethwandaba weWestern Commonage ukuba umsolwa wafika endlini yakhe ngehola lika-9 ebusuku wafica umamangala engekho.
Kuzwakale ukuba umsolwa wahlala phandle walinda umamangala. Khonokho nje kubikwa umamangala wathutsha evela bona udadewabo owayegula elokitshini leNtumbane.
Umtshutshisi wecala leli uqhubekele phambili ngokubikela inkundla ukuba umsolwa kazange azihluphe ngokubuza umamangala ukuba uvela ngaphi kodwa wahle wamvuthela ngamampama ebusweni langezibhakela esiswini.
Kubikwa ngemva kokumtshaya umsolwa waphinda wamnikela ngezinja ngoba esithi uyamdelela yikho ehambe lamakhiye engamazisanga ukuthi uyangaphi.
Udaba lwabikwa emapholiseni okwabangela ukuba umsolwa abotshwe.
Ekuthonisisweni kwecala leli umsolwa utholakale elecala lokutshaya umkakhe ngakho umantshi uMnumzana Richard Ramaboea unqume ukuthi ayesebenza kungelambadalo okwamahola angu-105 enkambeni yamapholisa.
