uMthunywa
LULUJU lodwa oluza loMthunywa kule iviki kwezokuthokozisa uzulu nanko phela uze lengadlangadla yejaha elicula umaskandi kuzwakale. Angithi lelijaha lidabuka eTsholotsho esigabeni seNyanda njalo kalitshayi nje isiginci lelijaha lenza amanga.
Kambe kungaba ngubani ocula kangaka ngaphandle kukaAlson Thebe ijaha elimajaha mabili. Othanda ukujabula kule iviki nansi ingxoxo enambithekayo phakathi kwentathli yephephandaba likazulu uCornelius Luphahla (CL) lomculo wodumo lo uAlson Thebe (AT).
CL: Akwethule kancane imbali yezomculo wakho lokuthi wagqugquzelwa yini uze ukhethe ukucula umaskandi.
AT: Mina ngakhula ngingumuntu othanda amasiko kakhulu kanye lomculo kamaskandi. Ngokunjalo ngananzelela ukuthi amasiko lomculo kamaskandi kuyahambelana. Kwathi ngomnyaka ka2016 ngikweleSouth Africa ngaqalisa ukucula umaskandi ngenhloso yokuthuthukisa ulwazi lwami kwezamasiko.
CL: Uzulu uthanda ukwazi ukuthi njengomculi uvame ukuculela ngaphi?
AT: Mina njengomculi ophila ekweleSouth Africa yikho-ke engivame ukuculela khona ngisenza ama-shows, ngicule emtshadweni kanye lakweminye njalo imidlalo etshiyeneyo. Okunye njalo ngizavakatshela kwelakithi ngiyejabulisa uzulu ngomculo wami ngoba yikho engidabuka khona. Lokhu ngizakwenza kumnyaka ozayo ngoMabasa.
CL: Lokhu waqalisa ukucula sowakhipha amadlalade amangaki njalo afundisani kuzulu?
AT: Lokhu ngaqalisa ukucula sengakhipha amadlalade amabili. Elakuqala ngalikhipha ngomnyaka ka2016 elilesihloko esithi Bangijikijela Ngamatshe, ngabuya njalo ngakhipha elinye lonyaka elilesihloko esithi Final Signature. Idlalade lami lakuqala likhuthaza uzulu ukuthi loba kukhona izitha ezikuhlaselayo kodwa kuqakathekile ukuthi uqhubekele phambili ugcwalisa izifiso zakho usebenza nzima.
Elesibili lona lifundisa abantu ukuthi akukho okungapheliyo njalo emhlabeni kusinwa kudedelwana.
CL: Abantu bathini ngomsebenzi wakho owenzayo njalo ukhangelele ukwenzelani umphakathi?
AT: Abantu bayawujabulela kakhulu umsebenzi wami njalo bangikhuthaza ukuthi ngiqhubekele phambili ngawo ngingadeli. Okunye njalo abalandeli bami bayangimema endaweni ezehlukeneyo ukuthi ngibavakatshele ngibadlalele ingoma zami.
Ngalokhu uzulu ngimthembisa ukuqhubekela phambili ngimjabulisa ngengoma zami ngimenzele lama-shows endaweni ezehlukeneyo.
CL: Bunzima bani oyake uhlangane labo kwezomculo njalo nkuthazo bani oyipha abaculi abasasungula?
AT: Ubunzima engiyake ngihlangane labo kwezomculo yikuthi abantu bayantshontsha umculo wami bawuthengise ngaphandle kwemvumo yami okudala ukuthi nxa sengiwuthengisa abantu abanengi bayabe sebelawo. Okunye njalo ngangikhathazwe luhlupho lokuswela imali yokuzithuthukisa kwezomculo.
Ngokunjalo kubaculi abasasungula ngithi kabaqhubekele phambili ngomsebenzi wabo bengadeli noma kunzima.
