uMthunywa
IMPUMELA yemihloliso isiphume yenela, bonke ababhala imihloliso nyakenye sebethethe okungokwabo.
Lesi yisikhathi ekade silindelwe nguzulu wonke. Lathi esingazange sahlalela imihloliso sikhiphe amehlo lapha awu.
Indlebe lazo ngapha zithiyiwe sifuna ukuzwa ukuthi uzibani lozibanyana bona nga benze njani.
Kubafundi kuzwakala imisindo yomibili, ukukhala kanye lokujabula.
Kulabo abaphumeleleyo yinjabulo yodwa emakhaya, ubaba lomama sebeze bebangisanga ukuthi umntwana ufuze bani. Ilo lalo ufuna kuthiwe ufuze yena.
Futhi abadala uthi bayahlekisa, mhla kukuhle uzwa kuthiwa, “umntwana lo ufuze mina” kodwa kungake kuphambaniseke kuphela ubaba uzwa ethi, “Nakazibani khuza umntanakho” kuthi umama laye ngapha azwakale etshinga ngathi, “lokhu kufuze uyise.”
Pho umntwana sengokabani njengoba abazali bonke sebemphika.
Labo abenze kuhle sebeqalile ukwenza amalungiselelo okuthatha inyathelo elilandelayo nanko phela abanye ngabadinga indawo ze A-Level kukanti abanye sebegijima lama-registration forms ema-university.
Okungizwisa ubuhlungu yikuthi kulabanye abantwana shuwa engangitshona ngihlangana labo bephethe inqumbi zengwalo othi lanxa uzikhangele uzesabe. Labo ke yibo esasicabangela ukuthi bazayenzela intshaka imihloliso kodwa lutho.
Khathesi nxa sihlangana labo abasafuni lakuyithintha indaba yama-results. Abanye njalo sebesima ngelokuthi, “angikathathi ngalahla ibhuku kumbe ngilesikwelede.” Lapho ke uvele uzazele ukuthi zimcithile umebraz noma usistez.
Kulezinye njalo ezazilomkhuba wokubhanka izifundo. Lesi sikhathi sikuveze mgceke lokho ngoba phela beziphumele lodwendwe lwabo U-pasile.
Njengoba abadala besitsho ukuthi umuntu uvuna lokhu akuhlanyelayo kuhle ke ukuthi ilo lalowo amukele impumela yakhe. Abanye baphethe babiza imihlolo lamaloyo. Isimanga yikuthi umnyaka ubuqale uze uphele umuntu engakaze alunguze ekilasini kodwa sefuna ukutshaya o-A.
Akulamihlolo lamaloyo akhona lapha, abantu abafunde ukunanzelela amaphutha abo ukuze kusasa benelise ukuwaqondisa.
Sitshayela labo abenze kuhle ihlombe njalo ngithanda ukukhuthaza labo abakhangelele ukubhala lonyaka ukuthi bafunde isifundo kulokhu okwenzakele kulabo abaphambi kwabo njengoba abadala betsho nje ukuthi indlela ibuzwa kwabaphambili. Sihlangene njalo ngeviki elizayo.
