uMthunywa
Vusumuzi Ndlovu
Isihloko: Speperegwan’
Umculi: Bhadilah
KUYAJABULISA ukuzwa ngomculo otshaywa ngumhlabeleli ongasuye wakoNthuthu. Lokhu kuyaphathisa njalo ukuthi sizwisise ukuba kumunyethweni ngaphandle kwesigodlo sikaMthwakazi.
UGift Lehlohonolo weBeitbridge wethule ingoma ekhuthaza ukuba uthando lwemali alulunganga. Lingoma icindezelwe eShinkasi Records iqondiswa nguBhadilah loDJ Drumz besesabelweni seMatabeleland South.
Ingoma le isebenzisa umdumo otshisayo wegqom’ ihlanganiswe le-kwaito. Umhlabeleli lo ucula ngesiNtu, ekubeka sobala ngolimi lwabatsha.
UBhadilah lapha ukhala ngontombazana odlala ngaye, njalo umxwayisa ukuba kuzamphelela ukuqabuka izinto asale engela lutho. Lintombazana ayisaqakathekisi uthando lwabo, ihlanyiswa nje yimali ize ibonakale lamadoda amadala alemali, ama-blesser. Lokhu kubangelwa yikuba bamthengela into ezidulayo lezidakamizwa, yena uBhadilah angeke azenelise. Ukhuthaza lintombazana ukuba ikhumbule ukuba impilo imfitshane, njalo uthando lwemali lezinto alwakhi.
I-Speperegwana ligama labatsha elitsho isimba mgodi, umuntu othanda izinto engafuni ukweqiwa yilutho.
Ngalingoma ukhuthaza wonke umuntu omutsha ukuba aqakathekise uthando ngezigaba zalo empilweni ngoba kulesifundo esizaphathisa kwelakusasa. Uyatsho ukuba labo bantu abadala bayabe sebakha ezabo impilo baqeda ngakho ukuthandana labo yikuqhuba nje isikhathi kibo njalo ngeke kwakhe ikusasa labo.
Ngakho uthi abatsha bangathandi izinto ngoba sonke isenzo silemfundo lembhadalo yaso, njalo kulemikhuhlane esiqede izizwe ngokungaziphathi.
Ekuxoxisaneni laye uBhadilah, uzwakale elokuthokoza ukuba njengentsha ekhulele eBeitbridge, umculo wakhe usuwenelise ukumxhumanisa labantu abanengi asebenze labo kungoma yakhe le. Useke wahlabela ezindaweni ezinengi ezigoqela iVictoria Falls leMutare. Usesebenze loBoom Betto weHarare, lengqwele yakuleli uCal_Vin kwezinye zengoma zakhe. Kule yona usebenze lamajaha eGwanda, iZhezhingtons, uDonara kanye loTentricks.
U-Spepregwan’ usenelise ukuba adlalwe emisakazweni njalo uyafisa ukuba ngabe iyafika lakweminye imisakazo yakuleli. Lelijaha ngelinye labakhethwayo kuzicoco zakuleli ngemisebenzi yakhe ye-kwaito.
Phandle kwelizwe useke wasebenzisana leBlackMoon yaseSouth Africa, njalo ukhangelele ukusebenzisana labanye abanengi. Uthe kapheli moya njalo uzaqhubekela phambi ngoba usesemude umango.
