uMthunywa
Nkosilathi Sibanda
KUMINYAKA elandelayo ubukhosi benguqu engaphansi kweZifa kumhlubulo ongezansi yelizwe buzaphathwa nguAndrew ‘‘Squad’’ Tapela.
UTapela ukhethwe linengi lamalunga avunyelwe ukuvota ngeSonto edluleyo. Uthole amavoti angamatshumi amabili wanqoba uMusa Mandaza ovotelwe ngababili kuphela.
Impumelo yokhetho iveze ukuba uTapela ufunwe ngamalunga alitshumi lambili, uMandaza wathola eziyisikhombisa nje.
UTumediso ‘‘Drogba’’ Mokoena laye wehlulekile ukubuyela esikhundleni. UMokoena wenza inguqu yakulumhlubulo yaphakama kodwa lokhu akuncedanga ukumbuyisela.
Abanye abaphiwe umlandu wokukhokhela inhlelo zikanobhutshuzwayo babalisa uMehluli Thebe ovela edolobheni leHwange ovotelwe ngamalunga alitshumi lambili lanhlanu, uTizirayi Luphahla othole amavoti angu-24, Fiso Siziba (23), Bryton Malandule (23) loGaylord Madhunguza ongene esikhundleni sikamsekeli kamgcinisihlalo kungela ombangisa indawo.
Ekhuluma kabanzi ngenhloso yakhe esikhundleni, uTapela wazise uMthunywa ukuba akumelanga amaqembu aku-Division One adlale mahala.
“Silomsebenzi osilindeleyo okumele wenziwe. Amaqembu kumele athole okuthile ngokuncintisa kwawo.”
UTapela uthe bazahlosa ukuqinisa amaqembu ngokwenza amakilasi ezemfundo ukuze inguqu ikhokhelwe ngobungcitshi.
“Sizancedisa amaqembu ngokwenza ama-course njalo sizakuba lamaqhinga okuvuselela inguqu yethu.
Amaqhinga la azakhangelisiswa kuze kuyefika umnyaka ka-2022.
“Ubukhokheli obuhle yilobo obubatshazwa ngumuntu wonke. Angithi nxa ukhokhela inhlanganiso kumele wazi ukuthi ukuphumelela kwayo yikusebenzelana labantu kuhle. Yikho esizakwenza.
UTapela ubonakala engumkhokheli ozakwelula ulwazi lwakhe kunhlelo zenguqu. Waziwa kakhulu esakuqembu leHighlanders lapho owayengunobhala jikelele anduba isikhathi sokubusa siphele.
Abahlaziya ngezombuso wenguqu batshele uMthunywa ngeviki edluleyo ukuthi uMandaza wayengeke abuyele esihlalweni ngoba wayesehlezi okwesikhathi eside.
