USOMA UTSHONTSHA KOMAKHELWANE

USOMA UTSHONTSHA KOMAKHELWANE

0 113

Nkosilodumo Ndebele
UKELVIN Nyoni owayengunozinti weBulawayo Chiefs usekhethe ukuthi ayekhuzwa ngu-Amin Soma Phiri kuqembu leBulawayo City.

Lokhu kuza ngemva kokuvulwa kwefasitela lokuthengwa kwabadlali kunguqu yeligi yeCastle Lager. Sekuvele amaqembu amanengi atshengise umona omkhulu ngokufuna ukucutha inkukhu ephilayo insiba beyitshiye isopha igazi.

Lesi yisehlakalo esiseduze lokwehlela iBulawayo Chiefs ngokuyithathela inengi labadlali bayo isizini isekude lokuthi ifike ekucineni.

IBulawayo Chiefs ebisibizwa ngokuthi inguDavida wePSL ngenxa yokuwisa oGoliyathi abathathu iHighlanders, Ngezi Platinum leFC Platinum kukhanya isifike emaphethelweni okunqoba ngenxa yokuthi kuzamele yakhe iqembu kakutsha.

Okwesikhatshana lesi ifasiteli lokuthengisa abadlali livuliwe izabe ilovalo entanyeni iChiefs.

Isilahlekelwe ngumdlali wabo ovikela amabhola ukuthi engangeni emambuleni uNyoni oseyeqele eqenjini likamansipala iBulawayo City.

UPolite Moyo ngomunye wabadlali okukhanya efuna ukubalekela aMakhosi.

Abanye abadlali abakhanya betshengise ubungcitshi obujabulise ingqungqulu zePSL nguShadreck Nyahwa, Last Sithole, Brighton Manhire, Clement Makamba loArthur Masiyiwa.

Umkhokheli weBulawayo Chiefs uDumisani Sibanda uthe kasoze avimbe ukuthi lababadlali behambe nxa sebethethe isinqumo sokusuka.

“Kuliqiniso ukuthi abadlali abanengi bajabulise amaqembu amanengi kuPSL, lokhu kubavulele amathuba okuthi bahambe endaweni ezilenzuzo engcono kuleqembu lethu. Thina isikhwama sethu kasikhudumali kulesalawa amaqembu kungakho kuzabanzima ukuthi sincintisane labo ukuthi sijabulise abadlali.”

Uqhubeke wathi kuzabanzima ukuthi bathole abadlali abazadlala endaweni yalaba abahambileyo.

“Akusoze kube lula ukuthi sithole abadlali abazavala izikhala esivulwe yilaba abahambileyo, kodwa kuzamele sibone ukuthi sizazivala njani lesilo esesikhangelane laso phambili,” kutsho uSibanda.

Ingxenye yesibili yesizini yalonyaka ibelesiqalo esibi kuMakhosi amahle ngoba benqontshwe yiYadah FC.
Loba indlela itshengisa ukuba izabe ilameva phambili, bathe bazazama ngazo zonke indlela ukuthi balwele ukuthola amaphuzu amanengi angabavikela ukuthi bengaxotshwa kuPSL emaphethelweni esizini yalonyaka.

“Asazi ukuthi sizakwenza njani ukuthi singaxotshwa kuPSL ekupheleni kwesizini kodwa silethemba lokuthi sizathola amaqhinga okuthi sidlule kulesi sikhathi esinzima siyingxenye yePSL,” kutsho uSibanda.

SIMILAR ARTICLES

0 92

NO COMMENTS

Leave a Reply