uMthunywa
UZEHLISILE wacela uxolo kubalandeli umqeqetshi weKaizer Chiefs, uGiovanni Solinas, ezakhe ziqeda umdlalo ka-10 zihluleka ukuhlula i-Orlando Pirates emdlaweni we-Absa Premiership eFNB Stadium, eNasrec, ngoMgqibelo.
IChiefs ikhale ngaphansi kuPirates ngo 2-1 ikade ibekwe phambili nguKhama Billiat. AwePirates atshaywe ngu-Innocent Maela loVincent Pule esigabeni sokuqala.
Abalandeli baMakhosi, abebekade bephume ngobunengi, bebesebezitshelile ukuthi liyaphela ishobolo lokuhlulwa yiPirates kodwa izinto zaphenduka kungakapheli lemizuzu emingaki. Amakhosi ahluleka ukuvikela ibhola lawo loba ukutshaya elesibili.
“Siwuqale kahle umdlalo, satshaya ibhola, sahamba phambili nge 1-0. Emuva kwalokho sahuqa ubuthongo, savula izikhala. Sivele sathamba emuva. Esigabeni sesibili abafana bami badlale kahle kakhulu. Sakhe amathuba. Ngicabanga ukuthi umdlalo ubukade ulingana. Asiwuphathanga lePirates ayiwuphathanga. Ngiyayibongela iPirates ngokunqoba lumdlalo wabakhaya,” kutsho uSolinas.
“Ngiyaxolisa kubalandeli ngoba ukuhlulwa komkhaya kubuhlungu. Abadlali bazamile langemizuzu yokucina ukutshaya ibhola lokulinganisa ukuze singahlulwa. Kodwa libhola leli. Manje sekufanele sithole ukuthi kungani sihuqe ubuthongo emuva kokutshaya ibhola. Bekufanele siqhubeke ngokudlala ngoba siyazi ukuthi kowomkhaya imininingwane emincane yenza umehluko. Kodwa kulungile, sifundile kulumdlalo womkhaya. Kudingeka sizilungise ngokomqondo sazi ukuthi siyiKaizer Chiefs futhi sidinga ukuthi kuhlale emqondweni wethu ukuba abanqobi.”
Ngaphandle kokuncitsha into abalandeli ezobajabulisa, Amakhosi alahlekelwe lithuba lokunyuka ku-log yePremiership.
IChiefs iyoze idlale oweligi ngoLwezi 7 nxa isikhangelane leBlack Leopards eFNB Stadium. Amakhosi asanda kuyikhipha kuTelkom Knockout iLeopards.
“Leli libhola, yimpilo, kufanele siqhubekele phambili. NgoMgqibelo silomunye umdlalo, kufanele sikhohlwe owomkhaya. Kubuhlungu. Ngiyaxolisa kubalandeli. Kodwa impilo iyaqhubeka. Iligi ayikapheli. Sizoqhubeka ngokulwa, sizame ukunqoba eminye imidlalo ukuze sibeke iChiefs endaweni ekahle ku-log. Emdlalweni odluleyo, asiwaqoqanga amaphuzu. Sihlulwe yiPolokwane, manje sesihlulwa kowabakhaya. Lokho akukuhle kodwa siqhubekela phambili. Iligi ayikapheli. Iligi izophela ngoNkwenkwezi. Sidinga ukubamba umgqigqo,” kutsho uSolinas.
Ngempelaviki iqembu lakhe lizobhekana leSuperSport United ku-quarterfinal yeTelkom Knockout.
