uMthunywa
Nkosilathi Sibanda
BASINDE ekutsheni omongikazi ngemva kokutshelwa yizindlu abahlala kuzo ekilinika yeSt Paul’s eLupane ngeviki edluleyo.
Umlilo lo, oqhamuke ngehola lesitshiyaminwe mibili ngoLwesine ntambama, utshabalalise izindlu ezilitshumi lambili lempahla yonke ebiphakathi kanye lendlu eyodwa ebisetshenziswa njengenkamba yamapholisa.
Kubikwa impahla etshabalale kuqhamuka umlilo lo ibiza amadola afika phose i$35 000.
Umongikazi omkhulu kulesi isibhedlela uNkosikazi Siphephisile Nyoni uthe akwaziwa ukuthi kuyini okwabangela umlilo lo. Uthe omongikazi abasela ndawo yokuhlala njalo sebecela ukufihla amakhanda kwabanye lakuzakhamizi.
“Silusizi ngokwenzakale lapha. Umlilo uqhamuke ngehola lika-8 ntambama watshisa izindlu zabongikazi.
Kutshe yonke into ebiphakathi.”
Kubikwa isicitshamlilo esivela koBulawayo safika ngemva kwamahola ayisithupha, umlilo usuqede impahla yonke.
Ngesikhathi omongikazi kanye lezakhamizi zakule indawo besakhakhamele ukuba bazaluthola ngaphi usizo njengoba besebesele egcekeni bavakatshelwe nguMnumzana Kletus Khumalo webandla le Zimbabwe Democratic Party (ZRDP) ofisa ukuba ngumeli wedale lephalamende eLupane East njalo engowebandla lezombusazwe iZimbabwe Rainbow Democratic Party (ZRDP) emele ibandla lakhe unikeze omongikazi laba ingubo, ukudla lezinye impahla abazidingayo.
“Njengebandla selule izandla ngesilakho ukuze sincedise omongikazi abehlelwe yingozi. Sonke njengabafisa ukuvotelwa silomlandu wokuphathisa,” kutsho uKhumalo.
USobhuku wakulindawo uMnumzana Richard Ncube uthe kuhle ukuba amabandla ezombangazwe ayakhumbula ukuthi nxa abantu behlelwe yingozi kumele baphathiswe.
Kusenjalo uSikomitshi waseLupane uEnnety Sithole uthe kudingeka i$150 000 yokulungisisa okutshe khona.
Okhokhela i-ZRDP uMnumzana Cuthbert Ncube uthe bathe besizwa ngesikhalazo lesi bakubone kufanele ukuthi baphange bayephathisa.
