UPHETHE ‘UMUTHI’ WOKUYIVUSA I-BOSSO

07 Jun, 2018 - 00:06 0 Views
UPHETHE ‘UMUTHI’ WOKUYIVUSA I-BOSSO Nigel Makumbe (Wesokudla)

uMthunywa

Intatheli KaMthunywa
UKUSILA kukaNigel Makumbe kuveze obala ukuthi lumdlali uphethe “umuthi” wokuyivusa ebuthongweni iHighlanders.

Umdlali lo uphenduke umafavuke, ngesikhathi izitha zeBosso zisithi akusela lutho. UMakumbe ekufikeni kwakhe enkambeni yomqeqetshi uMadinda Ndlovu, uthandwe ngababukeli abancome ngobuhle bomdlalo wakhe.

Ngempelaviki edluleyo lumdlali ukhethwe eqenjini elanqoba iChapungu Emagumeni. Ulibambile ibhola esiswini senkundla, njalo belifika kulo olibizayo phambili.

Abalandeli bakaMantengwane besebelahle ithawulo ngemva kokudonsa amaviki iqembu lithola umklomelo owodwa.

Ukuphenduka kukaMakumbe kuphaphamise lomgadli uNewman Sianchali osekhanya elola inyawo kumidlalo embalwa edluleyo. Ezikamagebhula zidibana leBulawayo Chiefs kumdlalo olandelayo. Loba imisila iphezulu ngokusila kukaMakumbe kujabulisa, insolo enkulu ikubadlali abasuka beyekethise ngokulahla ibhola.

Manengi amathuba adlaliswayo ikakhulu kubagadli.

Ebuzwa ngokuvuka khwatshu kweqembu lakhe, umqeqetshi weqembu uMadinda Ndlovu uthe ngabe iqembu lakhe lithela amabhola amanengi entanjeni. Ukudibana lomakhelwane iBulawayo Chiefs kuzaphosela abagadli emehlweni abantu kulindwe ukubona ukuthi bazawenelisa na amabhola avela kuNigel.

“Sibe lenhlanhla ngokuphenduka kukaNigel ngoba usisukumisile eBF. Siyabonga.

“Owabukelayo uzavuma ukuba ithemba lethu likuNigel Makumbe,” kutsho omunye wabalandeli bethimu u-Onesmo Siwela ebulenjini.

Kulabalandeli abaxhumane lephephandaba likazulu abathe iqembu liswela ingcitshi zabadlali ezikwazi ukuhlohla.

“Kumele uMadinda ananzelele ukuba angeke sithembele kumdlali oyedwa. Abagadli abafunde ukuhlohla,” kutsho umlandeli weBosso uMluleki Moyo.

“Abanye abadlali abenelisi ukudlala inguqu okwemizuzu engu-90, kungakho uMadinda kumele adinge abanye abangabangenela nxa laba abaqalileyo ukungena sebediniwe,” kuqhubeka uMoyo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds