uMthunywa
Yintatheli kaMthunywa
ABALANKANI abantu beBemba, eTsholotsho ngomfundi ovakatshelwa nguSathane abesephenduka abe lilangabi, uMthunywa uyakuveza lokhu lamhlanje.
Impicabadala le yenzakale kumaviki amabili adluleyo lapho omunye umfundi (igama siligodlile) owenza ugwalo lwesikhombisa kumfundo yaphansi esikolo seBemba Primary okubikwa waveza ukuba uvakatshelwa nguSathane njalo uyatsha umzimba wonke ngesikhathi esesikolo.
Kubikwa umfundi lo waqala ukuvakatshelwa nguSathane lo ngesikhathi esiyatheza inkuni zokupheka ezindlini abahlala kuzo esikolo.
UMthunywa uzwe ukuthi umfundi lo owayehamba lomngane wakhe besiyatheza wanyathela i-asbestos andubana azwakale esithi kulento ehwabhayo ngaphansi konyawo lwakhe.
Kubikwa ngokucwayiza kwelihlo umfundi ayehamba laye wabonakala esecela ezinyaweni ethi kasamboni umngane wakhe usebona ilangabi nje lomlilo.
UMthunywa uzwe njalo ukuba ngalesosikhathi umfundi lo wayesehlaba umkhosi ephaphatheka indawo yonke esithi usemlilweni ovuthayo kodwa isimanga yikuthi lowomlilo wawubonwa nguye yedwa.
UMthunywa ukhulumisane lomunye umbalisi owayekhona kusenzakala lokhu ochaze ukuba umfundi lo eqalisa babecabanga ukuthi uyazenzisa.
“Babuya begijima bevela theza inkuni bucwadlana nje lesikolo omunye ephambili omunye esemuva.
“Owayephambili wathi umngane wakhe uthe kukhona akunyatheleyo phansi osokumenza nxa emkhangela angamboni kodwa abone ilangabi lomlilo.
“Ngikhuluma labo ngangicabanga ukuthi bayazenzisa kodwa ebusuku umntwana waqala iziga ehlaba umkhosi okwakutshengisa ukuba kukhona akubonayo kodwa okungabonwa ngabanye,” kuchaza umbalisi lo, ongathandanga ukuqanjwa ngebizo.
Umfakazi lo uphinde wachaza ukuba umfundi lo wayengazenzisi kodwa wayehlutshwa yimimoya.
“Ngesikhathi ekhala kwakutshengisa ukuba uyalwa njalo evika okwakuveza sobala ukuthi kulezinto ezimtshayayo ngoba lodenda alukhuphayo ngolomuntu otshaywe ngondofa,” kutsho umbalisi lo.
UMthunywa uvakatshele kule indawo ngoLwesibili kuyonale iviki wakhuluma logogo womfundi lo, uMaphosa olandise ngendaba le etshwaqisa umzimba.
“Okwehlela umzukulu wami kangikuzwisisi lalamuhla lokhu. Ngathunyelwa abafana ebusuku bazongimbiza ukuthi ngibuye esikolo umzukulu wami usephathekile emzimbeni. Ngavuka ngaya khona ngafika ngamthatha walala kuhle, ekuseni nje ngambona eseqa enginamathela ngambuza ukuba kuyini wathi ngiyatsha gogo, nguSathane,” kuchaza ugogo uMaphosa ngenhliziyo ebuhlungu.
“Ngadinga umuntu bamkhulekela, wakhupha udenda wathi bekulento ebikade imthandele umzimba wonke ngesikhathi kukhulekwa ibimalisa ukuba avale amehlo. Ngesikhathi beqeda ukumthandazela uthi wezwa angathi kulento eyawela phansi yathi di, umzimba wakhululeka,” kutsho ugogo uMaphosa.
Uthe kusukela mhlalokho umzukulu wakhe usengcono.
Imizamo yokukhuluma loProvincial Education Director wesabelweni seMatabeleland North yehlule ngoba engekho ehofisini.
