uMthunywa
Musa Janga
I-ZIM DANCEHALL ngumculo odume kakhulu kweleHarare ngakho umfana wakoBulawayo laye engehlulwa yini ngalumculo.
Kulojaha uProgress Tapera oleminyaka engu-20 yena obizwa ngokuthi Young Chairman kwezomculo othethe umculo weZim dancehall wawuletha koBulawayo.
Ekhuluma lentatheli kaMthunywa uveze ukuthi waqala ukuhlabela ngesikhathi esenza izifundo zakhe eMpopoma High School wasekhipha idlalade lakhe lakuqala ngomnyaka ka 2016.
“Ngaqala ukuhlabela ngisafunda eMpopoma kwathi-ke lapho ngasengikhipha idlalade lami lakuqala ngo2016 njalo kulelinye eliphumayo kunyanga elandelayo,” kuchaza uChairman.
Uqhubekele phambili echaza ukuthi ngesikhathi ethatha isinqumo sokuhlabela iZim dancehall koBulawayo wayelokwesaba ukuthi umculo wakhe awusoze wamukelwe kuhle ngoba ehlabela ngesiShona.
Uqhubeke ngokuthi ukuhlabela ebantwini waqala kuGala eyayenziwe eWhite City Stadium, lapha yikho abona khona abantu bezithakazelela izingoma zakhe.
Ngemva kwalokhu yikho lapha abona kungcono ukuthi awuqhubekise phambili umculo wakhe.
“Ngathi ngiqalisa ukuhlabela iZim dancehall ngangilokwesaba ukuthi abantu abasoze bawamukele umsebenzi wami ngoba idolobha lakoBulawayo kugcwele amaNdebele abanye bayabe bengezwa engikuhlabelayo,” kuchaza uChairman.
Uthi njalo ngaphandle kokugogeka kwakhe uthole usekelo olunengi kubangane, kumuli yakhe kanye lomphakathi bona abakhanya bewujabulela umsebenzi wakhe.
“Abanye abagogekileyo balokwesaba ukuveza iziphiwo zabo kodwa mina angizange ngikuvumele lokhu yikho nje ngiwuqhubekisa phambili umsebenzi wami njalo okunye okungijabulisayo lusekelo engiluthola ebanganini, lakumuli yangakithi,” kuphetha uChairman.
