uMthunywa
YiNtatheli kaMthunywa
UMQEQETSHI wamaWarriors uCalisto Pasuwa usebike ukuthi usegeze izandla ngokutayila okwenziwa yizisebenzi zeZimbabwe Football Association.
UPasuwa uthe indlela amalungiselelo akhe omdlalo weChan lezwe leComoros ngeSonto aqhuba ngawo kuveza ukuthi iZifa ayizimiselanga.
Imidlalo yeChan inxusa abadlali abatshibilika kumaligi emazweni akubo.
UPasuwa wale wemba phansi watshela uMthunywa ukuthi inhlanganiso yeZimbabwe Football Association (iZifa) ayikamphathisi ngitsho ekubumbeni ithimu.
Lokhu ngokwesibili kuliviki uPasuwa esebenza njengesigqili. Kuhambo lwethimu enkulu isiyadibana leTanzania kumkhankaso weAfcon, amaWarriors alolonga okwelanga elilodwa anduba angene umango ngebhasi.
UMthunywa uyakuveza ukuba ngoLwesithathu uPasuwa ubephethe ekhalaza ngeholo lakhe.
Iphephandaba likazulu lixhumane lomaneja kaPasuwa uGibson Mahachi othe uPasuwa uzaqala ukulolonga amaWarriors nxa iZifa ingaphumela egcekeni ngemali yakhe.
“Imali kamqeqetshi ayikho. Ngikhuluma nje sisendleleni yokuya emahofisini eZifa. Kulohlelo lokubhadala abathi bafuna ukusitshengisa lona. Nxa sizasuthiseka, kutsho ukuba amalungiselelo azaqalisa,” kutsho UMahachi.
Isikhulumi seZifa uXolisani Gwesela lomaqhuzu wakhe uJonathan Mashingaidze kwehlule ukuthi bakhulume.
UMthunywa ukhulume loPasuwa obike ukuthi akufunayo yikuqeqetsha ekhululekile. Uthe abasekeli bamaWarriors awakholwe ukuthi amaWarriors azadlalela ukunqoba.
“Mina ngizimisele ukwenza umsebenzi wami. Abadlali babiziwe njalo ngizabakhuthaza ukuthi bakhohlwe ngokunengi, baqakathekise umdlalo weComoros.”
