uMthunywa
Thando Dube
KULENDODA yeMakokoba koBulawayo emiswe phambi komthethwanda isetheswa icala lokunqunula idlalise isitho sayo sangasese emphakathini.
UNkosilathi Dube oleminyaka engu-35 yokuzalwa umiswe emthethwandaba weWestern Commonage esetheswa icala lokuziphatha ngendlela elihlazo emphakathini nanko phela kubikwa wathinta uRoselyn Ngwenya ngesitho sakhe sangasese.
Umtshutshisi uMnumzana Petros Shoko ubikele inkundla ukuthi ngoMvulo mhlaka 19 Nhlolanja eWhite City Stadium kulemincintiswano yezikolo zokugijima, umetheswacala wavula ibhulugwe lakhe wakhipha isitho sakhe waqala ukuthinta ngaso umamangala owayemi phambili kwakhe.
Umamangala esizwa lokhu wathalaza wabona umetheswacala wahlaba umkhosi edinga uncedo.
Ngalesosikhathi umetheswacala wazama ukuvala ibhulugwe lakhe lokubaleka kodwa wabanjwa ngabantu ababebukele imincintiswano le.
Ebuzwa ngecala leli emthethwandaba, umsolwa ulivumile icala lakhe waveza ukuthi wayedakiwe njalo wayesekhulelwa yimizwa yocansi.
Ngemva kokulalela icala lobufakazi, umantshi uMnumzana Lungile Ncube uveze ukuba umsolwa kafanelanga ukuphiwa isigwebo se-community service ngoba wayezaqhubeka eganga kodwa ukuvalelwa ejele lapho ayezaguquka khona.
Ngemva kwalokhu uMnu Ncube uqume ukuthi umetheswacala avalelwe ejele okwamalanga angu-90 esebenza gadalala.
