uMthunywa
Nkosilathi Sibanda
LIPHUMA lendaba litshone lendaba ezingekho mnandi eqenjini leHighlanders nanko phela ngemva kokukhalala umdlalo kwabadlali, unozinti omutsha uAlfred Chiname usekhethe ukutshiyana leqembu.
Iphephandaba likazulu lincwetshwe indlebe ukuba lumdlali ufunwa ngamaqembu athile aseHarare njalo iDynamos ngenye evule amehlo.
Kubikwa izikhulu zaleliqembu zitshayana amakhanda, zizama ukubambanisa iqembu eselidabuke phakathi kulandela ukungezwani ngenxa yemali lokudelela kwabadlali.
UChiname utshiye ngoLwesibili ebika ukuba kasuthiseki. Unozinti lo ubengomunye okhethwe ngabaqeqetshi bebona ukuthi ithalenta lakhe lifanele kuthimu yezwe lonke.
Wenelise ukujabulisa abaqeqetshi kulandela ukuxotshwa kukaProsper Matutu loNedric Madeya.
Abafakazi abaqotho babika ukuba ukusuka kukaChiname kuzaphendukisa uMatutu osekhalaze ngokuswela iqembu lokhe wafuqelwa khatshana.
“Bakhathazekile abaqeqetshi ngokusuka kwalumdlali uChiname. Ubethenjiwe ukuthi abengunozinti ozancedisana loAriel egedini kodwa sizwe ngelikabathi ukuthi ikhona ithimu yaseHarare efuna lumdlali.
“Nxa sekunje, uProsper Matutu uzaphenduka. Akula ngenye indlela ngoba onozinti balutshwane kuleli njalo umqeqetshi usephelelwe ngamaqhinga,” kutsho umfakazi oseduzane leBosso.
UMatutu nguye lo owayefuna ukuthi abhadalwe $16 000 ukuze abambele iqembu.
IHighlanders iphange yabika ukuba ayizange ixabane loChiname kodwa behlukana laye ngemva kokuvumelana.
Kukhasi leTwitter, iBosso ithe “Sithanda ukubika ukuba sesehlukane lonozinti uAlfred Chiname. UChiname ubelethwe eqenjini ukuze engezelele umncintiswano kubonozinti kulisizini kusiyaphambili.”
Isizatho sokusuka kwalumdlali asichazwanga njalo ngesikhathi iphephandaba likazulu lidingisisa, umakhalekhukhwini kamaqhuzu uNhlanhla Dube ubengangeni, kubikwa ukuba kulomhlangano wokulungiselela uhambo lweqembu esabelweni seMpumalanga.
Kusenjalo iHighlanders ilubhekise ezintabeni zaseMutare lapho umqeqetshi uMadinda Ndlovu akhethe ukuthi abadlali bayeqansa intaba zakulindawo.
