Unguthandiwe uMadlela

Unguthandiwe uMadlela

0 423
UMadlela S’khobokhobo

Arnold Ndlovu
BEKUNGABIZWA ozwayo ePhelandaba Stadium ngoMgqibelo nanko phela abantu baphume ngobunengi babo besiyasekela umcimbi kaMadlela Day.

Abantu bebelitshebetshebe likaShangani kumcimbi lo okuveze sobala ukuthi ngempela lumhlabeleli unguthandiwe endaweni yakibo eGwanda.

Emcimbini lo, loSodolobho weGwanda uKhansila Knowledge Ndlovu ubekhona.

Ukugcwala kwabantu emcimbini lo kuveze njalo uthando abantu abalokhu belalo kubahlabeleli basekhaya ngoba besekele bonke abahlabeleli abatshaye emcimbini lo.

UJaphet Lunga obesemcimbini lo, ubikele intatheli ukuthi ukuhlakanipha komhlabeleli lo lenkundla ayikhethileyo kuncedise kakhulu ukuphumelela komcimbi lo.

“UDlam Dlam lapha utshengise ukuhlakanipha okuphezulu ngoba ukhethe iPhasika ngoba wonke umuntu uyabe ephumula, njalo ukuletha umsebenzi lo eGwanda kuncedile ngoba endaweni le akuvamanga ukuba lemicimbi enje elabahlabeleli abanengi kangaka.

“Abantu beGwanda baveze uthando kanye losekelo lwabo kuMadlela kanye labanye abaculi bakithi. Okunye lathi njengezakhamizi okusijabulisileyo yikuthi uSodolobho wethu weGwanda uKhansila Knowledge Ndlovu ubekhona laye,” kuchaza uLunga.

UMadlela utshengise ukuthanda indawo yakibo ngoba ubebize labahlabeleli bendaweni yonale okufana leqembu lamaZhezhingtons abatshengise ikusasa elihle kwezomculo.

Umhleli womcimbi lo uMadlela Skhobokhobo uthe uyathaba ukuthi abantu batshengise ukuthanda umculo walapha njalo ufisa ukuqhubeka kunjalo.

“Indlela abantu ababuye ngayo lapha kuyatshengisa ukuthi abahlabeleli bekhaya sebephiwa ithuba njalo uzulu uzimisele ukubasekela,” kuphetha uMadlela.

SIMILAR ARTICLES

NO COMMENTS

Leave a Reply