uMthunywa
YiNtatheli kaMthunywa
IHIGHLANDERS izahlala izisola ngokuxotsha uSimon Munawa eqenjini kulisizini ngoba lumdlali useyintandokazi yeqembu leChicken Inn.
Umqeqetshi weChicken Inn uJoey Antipas ubika ukuba uzizwa ejabula nxa ebukele uMunawa edlala ngoba indlela alitshaya ngalo ibhola bambalwa abadlali abakuligi yePSL abangenza njalo.
UAntipas uthe uMunawa lanxa elolonga, umtshiya emanzi ngokumangaliswa yikuzimisela emdlalweni.
Umdlalo kaMunawa awutshengise ngoMgqibelo mhla bedlala leDynamos yiwo ovuselele lumdlali, okwenze wathola ukubatshazwa ngumqeqetshi.
“Uyangijabulisa umdlalo kaSimon Munawa, uyazi ukuvuselela umdlalo. Utshibilike okuthabise wonke umuntu esiswini senkundla. Loba bonke abadlali bedlale beliqembu linye, ngithanda ukubika ukuthi uMunawa, uhambe phambili,” kutsho uAntipas.
Okwenziwe nguMunawa kungabe kutshiye labalandeli beHighlanders belahla izandla bezisola ukuthi kungani lumfana engahlanga kubo kulisizini.
Ngesikhathi ebizwa yiChicken Inn, uMunawa waxoxela intatheli le ukuthi umdlalo wakhe awusoke ufane nxa esengaphansi kuka-Antipas. NgoNhlolanja uthe abalandeli bakhe bazasukuma kokuphela.
Lonobhala weChicken Inn uTavengwa Hara akakufihli ukuthi uMunawa ngumdlali ababemdinga okwesikhathi eside njalo uzakuba yinsika yokuvusa iqembu nxa seliphunyuka kuligi.
Umdlalo kaMunawa unconywa ngabaqeqetshi labonozindaba bezemidlalo kuleli abafananisa ukudlala lokuzimisela kwakhe kumasizini adluleyo njengo-Paul Scholes owake wadlalela iManchester United. Umdlali lo kuyaziwa ukuthi wasuswa kuHighlanders ngoba kuthiwa usemdala. Ungene eqenjini lika-Antipas eligcwele abake badla ubhedu ababalisa uClemence Matawu, Moses Jackson, Thabani Goredema labanye.
Abadlali abadala laba bathenjwe nguAntipas ukuthi benelise ukusebenzisa ulwazi lwabo kumaqembu amanengi akhethe ukudlalisa abafana abasacathula kumidlalo yePSL.
