uMthunywa
NGEZIMNANDI zodwa ezilethwa liphephandaba likazulu kusa kwamalanga nanko phela lakule iviki silethela abalandeli umhlabeleli wengoma zokholo uInnora ibizo lakhe lokuzalwa engu-Innocent Banda.
UInnora uxoxe lentatheli kaMthunywa nansi ingxoxo phakathi kuka Innocent Banda (IB) lentatheli kaMthunywa uArnold Ndlovu (AN).
AN: Banda mfowethu, ake usitshele ngamafitshane nje mayelana ngawe langomculo wakho.
IB: Mina elokuzalwa ngingu Innocent Banda kodwa engilisebenzisa emculweni ngelithi Innora ngingumculi ohlabela ezokholo, ukuhlabela ezokholo ngaqala ngo 2013 njalo ngagqugquzelwa ngumhlabeleli wokholo uClarence Garura.
AN: Njengomuntu owaqala kudala ezomculo akutsho ukuthi usebenzisana labobani?
IB: Mina ngingumuntu osebenza eyedwa, ezikhathini ezinengi ngiyazihlanganisela insimbi lapho besengifaka ilizwi lami ngikhiphe ingoma ehlabusayo.
AN: Abantu bawamukela njani umculo wakho, bayawuthakazelela yini?
IB: Kasiwo wonke umuntu othanda into engiyenzayo, ikakhulu nxa ngikhangela intsha engikhula layo abanye bebengichothoza ngokukhetha umculo wokholo kodwa ngaqinisela langothando lokusekelwa yimuli yami ngaqinisela ngomculo lo ngaqhubekela phambili.
AN: Kuhle lokhu jaha, akutsho uwenzela ngaphi umculo wakho njalo abantu bangalinxusela kuyiphi imicimbi?
IB: Mina njengomhlabeleli wokholo ngijayele ukuhlabela kakhulu emasontweni atshiyeneyo okunye ngiyanxuswa emicimbini yamankampani atshiyeneyo kanye lasemicimbini etshiyeneyo eyenziwa koNtuthu.
AN: Njengoba usuhle wakhipha idlalade emnyakeni lo abantu bengakhangelelani kusiya phambili?
IB: Lonyaka ngikhiphe idlalade lami lakuqala elibizwa “Uthando Lwakho” idlalade leli ngilikhiphe mhlaka 25 Nhlolanja njalo idlalade leli litshumayela ukuthandana loxolo empilweni zabantu.
AN: Bunzima bani elihlangana labo kwezomculo?
IB: Ubunzima bukhona sibili empilweni ngoba njengentsha abantu engikhula labo abawukhangeli umculo wokholo ngoba bagxile kakhulu emculweni wesimanjemanje, okunye udubo engihlangana labo zimali zokukhipha izingoma.
AN: Nkuthazo bani ongayipha intsha efuna ukungena endimeni le?
IB: Engingakutsho yikuthi nxa ufuna ukuba ngumhlabelelei wokholo landela inhliziyo yakho, ungavumeli ukuthi uze utshiye umculo lo ngoba abantu bengahambelani lomculo owenzayo.