uMthunywa
NGEZIKHALA kamnandi eziza lephephandaba likazulu maviki wonke nanko phela kule iviki lize lazo njalo ezigijimisa igazi. Angithi nje lize lengadlangadla ijaha lesintu elihaya imbongi kuthithibale impatha.
Kambe kungaba yiphi imbongi ngaphandle kukaMpumelelo Ncube. Kahayi nje ulomuntu phansi utshaya injondlondlo kuzwakale. Othanda ukujabula kule iviki nansi ingxoxo enambithekayo phakathi kwembongi uMpumelelo Ncube (MN) lentatheli yephephandaba likazulu uGladmore Ncube (GN).
GN: Tshela uzulu ukuthi waqala sekutheni ukuhaya inkondlo.
MN: Wonke umuntu uzalwa lesipho sakhe ngakho-ke mina ngavela kulomhlaba ngifumbethe amazwi amnandi akhwabithwa ngabanengi. Ngaqala ukuhaya ngisesigabeni sesibili, ngangithi ngingabhonga kuthule wonke umuntu bangilalele ngiwathulula amazwi amnandi. Ngomnyaka ka2000 ngaqalisa ukungena ezikolo zemalokitshini akoBulawayo ngihamba ngikhulumisana labaphathi bezikolo ukuthi ngisebenzisane labo.
GN: Waguqulezwa ngubani ukuze uphakame kwezokuhaya?
MN: Umuntu owaqala ukuphakamisa umsebenzi wami nguMeluleki Mhlanga obesebenza eMagwegwe Primary school onguye owayengixhumanisa labaphathi ukuze ngisebenzisane lesikolo ngiphakamise udumo lwami ngezokuhaya.
GN: Wandise ukuhayela ngaphi inkondlo zakho okukwenze waziwa ngabantu kangaka?
MN: Ngijwayele ukusebenzela kwelaseSouth Africa laseBotswana. Ngaphatsheya kwelizwe sengenze imicimbi embalwa ngiphakamisa umsebenzi wami. Kwesinye isikhathi abantu bayangibiza nxa belimicimbi efana lamadili kumbe imitshado ukuthi ngizobathokozisa ngamazwi ami amnandi.
GN: Abantu bathini ngomsebenzi wakho jaha njalo ukhangelele ukubenzelani abalandeli bakho njengomhayi?
MN: Abantu bayawuthanda kakhulu umsebenzi wami ngoba sengike ngabizwa emicimbini eminengi nxa kuthuthukiswa imisebenzi yesintu. Ngike ngabizwa kakhulu eZimbabwe International Trade Fair ukuthi ngizothokozisa abantu. Umsebenzi wami bayawuthanda kakhulu ngoba ngake ngaphiwa umvuzo eZITF owokuthi muhle umsebenzi wami. Umsebenzi wami uyikudla okumnandi endlebeni zabalandeli bami nanko phela sengibiziwe ukuthi ngizohaya lapha eTiBaKalanga Festival. Khathesi ngikhangele ukuthi ngikhuphe iDVD ukuze abalandeli bami benelise ukuthi bangibukele laloba yisiphi isikhathi abathanda ngaso.
GN: Bunzima bani oyake uhlangane labo njengomuntu ohaya inkondlo?
MN: Uhlupho engibelalo kakhulu yikuswela imali eyenelayo ukuthi ngenze amaDVD ukuze abalandeli benelise ukubona umsebenzi wami kumabonakude okuyindlela yokungivulela ithuba lokuthi ngingene kuma-awards.
GN: Njengomhayi oseleminyaka emide esenza lumsebenzi ulomlayezo bani owupha abasasungula ukuhaya inkondlo?
MN: Engingakutsho yikuthi ukuhlalela izandla akulethi ukudla etafuleni ngakho-ke ngithi intsha ekwaziyo ukuhaya kayisukume iqale ukutshengisa uzulu ukuthi isiphiwo sikhona. Kumele abantu beqinisele ngoba vele akuzake kwenzakala ukuthi umuntu engahaya inkondlo lamuhla uyavuka kusasa esedumile ngoba kuyathatha isikhathi eside ukuthi uzulu abekwazi, inkalakatha yikuba lesibindi njalo ubekezele.
Okunye njalo yikuthi nxa besahluma abahayi kumele bahambe bayokhulumisana loCont Mhlanga ngoba ngomunye wabantu abadala abake bangiphathisa emsebenzini wami.
