uMthunywa
YiNtatheli kaMthunywa
ABALIMI beVictors Chickens bakhuthaza abafuyileyo ukuthi bafuye izagwaca ngoba kazidingi ndleko ephezulu njalo amaqanda azo afanele kudliwa ngabantu ngoba elokudla okunengi ukwedlula awenkukhu. UMnumzana Anesu ofuyileyo njalo esebenzelana lenkampani yeVictors Chickens uveze ukuthi inyoni lezi azifuni ndawo eqandayo ngoba ziyafa nxa kuqanda.
“Izagwaca zifuna ukunakekelwa kakhulu ukuthi lapho ezikhona akungeni mqando ngoba azihambelani lawo. Kumele zihlale endaweni ewomileyo,” kutsho uMnu Anesu.
Uqhubekele phambili eveza ukuthi izagwaca zithatha isikhathi esifitshane ukuthi zikhule njalo zidliwe.
“Inyoni lezi zithatha amaviki ayisithupha kuphela ukuthi zikhule zithengiswe njalo ngomnyaka zibekela amaqanda ayi 280 inkukhu eyodwa. Umlimi ulakho ukuwathengisa azitholele inzuzo enhle. Amaqanda la aqakathekile emzimbeni womuntu ngoba ayakha umzimba njalo awalethi umkhuhlane emzimbeni womuntu.”
Uphinde waveza ukuthi ukudla okuphiwa inyoni lezi ngokulinywa ngabantu emasimini.
“Ukufuya inkukhu zeganga lezi akulandleko enkulu kakhulu ngoba ukuze zikhule zisebenzisa imali engange $0.40 kunkukhu eyodwa. Ziphiwa inyawuthi kanye ngelanga ngoba azifuni muntu eduzane kwazo kokuphela, zifuna ukuhlala zikhululekile,”kutsho uMnu Anesu
Ubuye wachaza ukuthi inkukhu lezi zilenzuzo enengi kakhulu.
“Umlimi ulakho ukuthengisa izagwaca zakhe nge$4 esisodwa njalo ikhampani yeVictors Chickens iyazithenga njalo ilomtshina wokucacada amaqanda masinyane ngentengo ephansi umlimi abesesiyazigcinela amatsiyane akhe,” kutsho uMnu Anesu.
Ekhuluma loMthunywa uMnumzana Anesu uveze ukuthi balutshwana eMatabeleland abagcina inkukhu zeganga lezi.
“Sithanda ukunxusa abalimi bakulesisabelo ukuthi basukumele phezulu basebenzelane labeVictor Chickens,” kuphetha uMnu Anesu.
Uphethe ngokubikela intatheli ukuba mhlaka 5 Mpalakazi kuzakube kuqeqetshiswa abalimi bakoBulawayo abafisa ukuthola ulwazi ngokufuya inyoni lezi.
