uMthunywa
Ukuhluzwa kogwalo
SIQALA ugwalo olutsha lapho umlobi alandisa khona ngochuku kanye lobuhlungu umuntu onsundu ahlangana labo ngesikhathi sempi yenkululeko kweleZimbabwe. Yindlela ebuhlungu ayilandisayo echaza ukuthi umuntu onsundu wayengaselakuthula ekuphileni kwakhe, lapho ayehamba khona wayengulowo owayehamba esethuka.
Umlobi wendaba ulandisa indaba yakhe engomunye walabo ababedabula amagusu, bedabula phakathi kobunyama ngenhloso yokuletha inkululeko ebantwini abansundu. Kusehlakalo sakuqala ulandisa ngohambo lwabo lokuqala bengabalweli benkululeko loba nje ngokwenkolo ayekhuliswe ngayo kwakucaca ukuthi kukhona okwakungahambi kuhle ngohambo lolu. Umlobi uthi yena, inyanga yayithule zwi impondo zayo zingani zibalazwe ngomzidlana obomvu, yikho lokhu kanye okwakutshaqisa umzimba wakhe. Wayekhumbula kuhle ukuthi abazali bakhe babemchazele mhlophe ukuthi lokhu kwakubika ukuchitheka kwegazi.
Ulandisa ngohambo lwabo belubhekise kumfula uGwembe. Abakhulu kubikwa babezwakala ngomsinjwana wezigxingana zamazwi bephendulana labanye ababengaphetsheya komfula. Abantu laba kucaca babekhaliphe kakhulu ngokusebenzisa izitho zomzimba ngobuchwepheshe obuphezulu. Babengalayo ikhampasi yokubakhomba indlela ngelithi basebeseduze lomfula kodwa nje bezwa sekunuka amanzi kwahle kwaba mqoka ukuthi basebeseduze lomfula uGwembe. Kwakudinga umuntu ohamba ngokukhalipha evuse inkophe aqaphe kulokho ayehlangana lakho.
Babedlula phakathi kwezigaba ezinzima ezazidinga umkhokheli owayecabanga okwamagama. Sekumele bachaphe umkhokheli wabona kungcono akhethe abathile ukuze bayedinga izikepe ababezachapha ngazo.
Indawo ababezachapha kuyo babengayijayelanga, ejayelekileyo yayisivele isizalele ingwe.Isitha sesesiyibonile satshaya saqothula. Kwasekudingakala ingqondo ekhaliphileyo lapha ngoba isitha sasivele sesisazi ukuthi kulendlela yabo yokuchapha okwakulula kakhulu ukuthi babachathamele kiyo.
Bazithola-ke izikepe bazidonsa baze bayafika lazo ekhunjini lomfula. Uvalo lwalubaphethe lapho, ababekubona kwakuzinkanyezi kanye legusu elimnyama lamanzi ayethule zwi. Kukho konke lokhu ababekubona babengazi okwakungabe kucatshe phakathi kwalezo ndawo zonke. Bachapha-ke kuhle bonke kwadingeka iqhinga lokuthi lalabo ababevelela eZambia labo bathole izikepe ukuze bachaphe kuhle besiza ekhaya. Uhambo lwakhona lwaludinga abantu abalenhlelo zokucabangelana kanye lokuncedisana kungenye yezindlela eyayiletha abantu abansundu ndawonye babambane.
