Umzila kawulandelwa

15 Nov, 2018 - 00:11 0 Views
Umzila kawulandelwa

uMthunywa

SIQHUBEKA lendaba yethu yamaqhawe ayelwela impi yenkululeko. Ngeviki edluleyo sitshiye uMzila esethekelelwe ngabafowabo.

Isibindi sasingathi sesibuya kancane sekulenhlasana yethemba. Balandisa labo ngobunzima obabuphandle lapha.

Babezwile ngokuchitheka kwegazi okwenzakale eJiba jiba. Amaqhawe aphela lapho ngomaquphula ababesethiwe.

Iganga lasala linuka phu ngezidumbu zabantu okwakuyinto eyayitshaqisa umzimba.

Kuthi kunjalo futhi isitha lesi sasingemanga. Sabonakala sisehlisa amasotsha angange tshebetshebe.

Balandisa labo ngokwethuka ukuthi kwakungaso sikhali esincane esasilapho kwakulemihlobohlobo yemibhobho, zonke izikhali lezi zazithengelwe umuntu omnyama, yeka isitsho sabadala esithi intengo yombuso ligazi.

Kusobala ukuthi lapha igazi lalizachitheka okwamagama.

Pho umuntu onsundu wayezakwenelisa ukubhekana lesilo esasihlome kangaka, sihlome ngaloluhlobo, labo bazibonela bengesizingane ukuthi umumo lo wawungasamanga kuhle.

Kwasekuqakathekile ukuthi banyathele ngonanzelelo.

Okunye okwasekuzwisa ubuhlungu yikuthi imizi yesigabeni seKheswa lapha yayisichithekile iphele du ngosizi, ithungelwa ngemililo, abantu bebulawa ngendlela ebuhlungu okwamagama kodwa singaziwa lesizatho ababesibulawelwa.

Kwakubuhlungu-ke ngoba kwakubulawa lengane ezingela sici, kuyini zona ezazikwazi ngezo mbangazwe. Uchuku lwesitha lwalunjalo-ke.

Kwakuqakathekile sibili ukuthi bangaze bathatha isikhathi eside belokhu belapha egumeni njengoba nje lemiduli ilendlebe kwakusazi bani ukuthi ngubani owayebukele konke lokhu okwakusenzakala bephithizela phakathi komuzi wakoNgwenya okwakuyikumdonsela amanzi ngomsebe.

Kwasekumele bavalelise bathembise-ke ukuthi babezaphenduka ngemva kwamalanga amathathu bezomlanda nxa kungehlanga okunye.

Kwasekumele baphuthume labo ukumsusa kulindawo ngoba kwasekukubi. Wabiselwa-ke esiphaleni uMzila abafowabo badliwa ngamahlathi, wasala laye elokulithemba ngaphakathi kwakhe lapha.

Ngemva kwensuku ezinthathu, uMzila wamangala ebona uMaZondo ethutsha esiphaleni kusesele.

Wazizwela laye ngomzimba ukuthi kukhona okwakutshaya amanzi lelolanga.

Masinyane nje wamtshela ukuthi kanamathele eqolo lakhe lapha amkhuphe esiphaleni ngoba wayengaphuphanga kuhle, kukhona okwakuzakwenzakala, zazimbi indaba ngalelo langa.

Wamkhipha esiphaleni lapha wayamfihla nje phakathi kwezihlahla zamatshabela ezimbili ezaziganyulwe ngaphandle kweguma.

Esenze njalo esiyamfihla kwakulokuyintombazanyana okwakuzitshwathike phakathi kwesixuku kwacaca nje ukuthi kwakubukele into yonke eyayisenzakala lapha.

UMazondo wafunga wagomela ngelithi leyo ngane kwakusamele ayifundise umthetho ngalelolanga ngoba yibo abantwana ababelakho ukuyaqamba amanga kusasa.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds