uMthunywa
BD Ndlovu
SISAQHUBEKA lendaba yempi lapho esihamba silandela impi etshisayo phakathi kwamasotsha kanye labafana beganga. Lapho satshiya abafana bempi sebehlaselwe kanzima yisitha esabalandela saze sabathola egangeni kwanuka igazi indawana yonke.
Ngemva kwesikhathi kwathula kwathi cwaka abafana beganga bakhangela ngelenhloli lapho abananzelela khona amasotsha afika esibholaneni abeka phansi imibhobho ayikhangelisa phansi okwabantu abakhatheleyo, njalo bekhanya bebuzisisa kubo mama ababesikha amanzi esibholaneni.
Kwasekungathi badiniwe okwamagama, lokhu kwakulithuba elihle lesitha ukuthi sigadle sichithe. Abafana beganga behlukana baba ngamaqembu amabili, kwakulicebo lokuhlasela isitha ngasempumalanga kwesibholane, ukuze kuvalelwe lesitha esasibaleka. Babebukele konke okwakusenzakala baze bananzelela lesotsha lesitha esasikhombele umfana ngombhobho sengathi lowo kwakumele akhulume iqiniso elithile nxa kwakungenjalo wayezadliwa luhlamvu lombhobho.
Basondela belokhu becatshe ngezixuku baze bafika eduzane kodwa beyilabo abacatshileyo ngezixuku lapho abafika baguqa khona bathi zwi.
Unyembeza ke wawubabambile loba basebesesimweni esicacileyo ukuthi batshaye balalise kwakunzima ukubulala umfana lo ababemi laye njalo engelacala. Besacabangisisa ngalokho abanye babo ngale kwalelicele bawukhulula bawuyekelela, labo-ke ngokufanayo abazange babe besabala amabala engwe, isitha kwabakude ukuthi bakhokhe imibhobho le abasebeyiphumuza, kwathi lomfana owayengela cala laye walahlekelwa yimpilo yakhe.
Kwababuhlungu nje ukuthi omunye wabafo wathi lapho evusa ikhanda ukuze abelesiqiniseko sokuthi ngempela isitha basebeqede ngaso wazithela phezu kohlamvu lwabafo olwamtshaya ubuchopho bachaphaka indawo yonke buthela kanye labafowabo okwaba yinto ebuhlungu okwamagama. Badubula baze babalesiqiniseko sokuthi basebeqede ngesitha.
Ngokuphazima kwelihlo kwakumele bakhuthuze izidumbu zesitha bedinga amagabha enyama kanye lenhlamvu zemibhobho.
Bathi nje sebethi basithele uMzilakawulandelwa wezwa umdumo wombhobho, lapho athi khwimilili uhlamvu lwamdaza intende yesandla lwayaphutsha ngale wasala engelankani. Kwathi uManyakavula lwamtshaya wahle waphangalala, okusobala-ke ukuthi uMzila wayesile ngenhlanhla yamaswazi.
Lapho-ke babaleka okwamagama sebecabanga ukuthi kwakungabanye ababezohlangula abanye babo. Kwaze kwathi ngemva kwensuku bezwa ukuthi kwakungomunye wamasotsha esitha owayetshaywe waqunywa inyawo zombili, waze waqediswa yisitha.
